La Bibia piemontèisa/Testament Vej/Neemia/Neemia 11

←Neemìa 10

La Bibia piemontèisa Neemìa

Neemìa 12→

La Bìbia piemontèisa - Neemìa 11

Neemìa

11

La populassion ëd Gerusalem

¹Ij cap dël pòpol a son ëstabilisse a Gerusalem; j'àutri Israelita a l'han tirà a sòrt na famija su des e a l'han mandala a sté a Gerusalem, la sità santa, antramentre che d'àutre neuv a son restà an d’àutre sità. ²Ël pòpol a l'ha benedì coj che spòtich, a l'avìo pijà la decision dë sté an Gerusalem.

³Costi a son coj che a son andàit a sté a Gerusalem an tra ij cap ëd la provìnsa giudèa, antramentre che ant le sità a son spantiasse për ël teritòri ëd Giuda e d'Israel, ij sacerdòt, ij Levita, j'assistent e ij fieuj dij servitor ëd Salomon: a stasìo tùit an soa sità e andova ch'a l'avìo ‘d proprietà. ⁴Costissì ij dissendent ëd Giuda e coj ëd Beniamin, stansià a Gerusalem^[1].

Dij dissendent ëd Giuda: Ataia fieul d'Usia, fieul ëd Zecaria, fieul d' Amaria, fieul ëd Sefatia, fieul ëd Malalel, dij dëssendent ëd Peres; ⁵e Maseia fieul ëd Baruch, fieul ëd Col-Hose, fieul d'Asaia, fieul d'Adaiah, fieul ëd Joiarib, fieul ëd Zecaria, dij dissendent ëd Sela^[2]. ⁶An tut, ij dissendent ëd Peres ch'a stasìo a Gerusalem, a l'ero 468 òm adult.

⁷Costi ij dissendent ëd Beniamin: Salu fieul ëd Mesulam, ël fieul ëd Joed, ël fieul ëd Pedaiah, ël fieul ëd Colaiah, ël fieul ëd Maseiah, ël fieul ëd Itiel, ël fieul ëd Jesaiah, ⁸e chi a-j andasìa dapress^[3], Gabai e Salai: 928 an tut. ⁹Joel ël fieul ëd Zicri a l'era sò cap, e Judah fieul d'Hassenuah a l'era scond ant ël comand ëd la sità.

¹⁰Dij sacerdòt: Jedaia ël fieul ëd Joiarib, Iachin, ¹¹Seraiah ël fieul ëd Hilchiah, ël fieul ëd Mesulam, ël fieul ëd Zadoch, ël fieul ëd Meraiot, ël fieul d'Achitub, supervisor ant ël templ ëd Dé, ¹²e ij sò colega a fasìo ël travaj për ël santuari: 822; e Adaiah ël fieul ëd Jeroham, ël fieul ëd Pelaliah, ël fieul d'Amzi, ël fieul ëd Zechariah, ël fieul ëd Pashcur, ël fieul ëd Malchijah, ¹³e ij sò parent, cap ëd famija: 242; e Amassai ël fieul d'Asarel, ël fieul ëd Acsai, ël fieul ëd Mesilemot, ël fieul d'Imer, ¹⁴e ij sò colega, òm ecessionaj: 128. L'ofissial an cap a l'era Zabdiel, fieul d'Haghedolim.

¹⁵Dij Levita: Semaiah ël fieul ëd Hashub, ël fieul ëd Asricam, ël fieul ëd Hashabiah, ël fieul ëd Buni; ¹⁶Sabetai e Josabad, cap dij Levita, a l'ero angagiasse ant l'euvra da fòra dël santuari ëd Dé; ¹⁷Mataniah ël fieul ëd Mica, ël fieul ëd Zabdi, ël fieul ëd Asaf, diretor dël cant sacrà^[4] ch’a guidava ant ël ringrassiament e ant la preghiera; Bacbuchiah, scond an tra ij sò; e Abda ël fieul ëd Samua, ël fieul ëd Galal, ël fieul ëd Jeduthun. ¹⁸Total dij Levita ant la Sità Santa: 284.

¹⁹E ij guardian dle pòrte: Acub, Talmon e soa gent, ch'a l'ero guardian ëd le pòrte: 172.

²⁰La rimanensa dël pòpol israelita, con sacerdòt e Levita a vivìo an tute le sità 'd Giuda, mincadun an soa proprietà. ²¹J'atendent al templ a stasìo ant un quartié 'd Gerusalem ciamà Ofel, e Zica e Ghispa a l'ero ij comandant. ²²Ël cap dij Levita an Gerusalem a l'era Usi fieul ëd Bani, fieul ëd Casabia, fieul ëd Matania, fieul ëd Mica. Usi a l'era dla stirp dij dëssendent d'Asaf, che a l'ero ij cantor responsàbij dël servissi al templ ëd Dé. ²³Ij cantor a l'ero sotmëtù a 'n regolament dël rè e a normative fissà di për di a soe atività al templi. ²⁴Nopà Petachia, fieul ëd Mesesabel, un dij dissendent ëd Zerach, dla tribù ëd Giuda, a l'era rapresentant dël pòpol a la cort dël rè 'd Persia.

²⁵Coj che a fasìo part ëd la tribù ëd Giuda, ma ch’a vivìo an soe proprietà an campagna, a stasìo an coste località: Chiriat Arba e ij vilagi dj'anviron, Dibon e sò vilagi, Jecabzel e sò ansediament ²⁶An Jesua, an Molada, an Bet Pelet, ²⁷an Casar Sual, an Ber Seba e sò vilagi, ²⁸an Ziclag, an Meconah e sò village, ²⁹an En Rimmon, an Zorah, an Jarmuth, ³⁰Zanoah, Adulam e ant ij sò ansediament, an Lachish e sò camp, e an Asecah e sò vilagi. Përparèj ch'a l'han butà camp da Ber-Sheba a la Comba d'Hinom.

³¹Cheidun dij dissendent^[5] ëd Beniamin a son ëstabilisse an Geba, Micmash, Aija, Betel e ij sò vilage, ³²an Anatot, Nob, e Ananiah, ³³an Hazor, Ramah, e Gitaim, ³⁴an Hadid, Zebojim, e Nebalat, ³⁵an Lod, Ono, e ant la Valada^[6] dj'Artisan. ³⁶Cheicadun-a dle division an Giudea dij Levita a l'é stabilisse an Beniamin.

Nòte

1. 11:3-4 cfr. Neemia 7:73.
2. La tradussion a récita מִן־הַשֵּׁלָנִי (min hashelani, "da lë Shelahita") al pòst dla letura MT בֶּן־הַשִּׁלֹנִי (ben hashiloni, "ël fieul ëd lë  Silonita"). Vëdde 1 Crònache 9:5.
3. Ebràich: "coj darera 'd chiel"; opura an sitand a la létera: וְאֶחָיו (vʾecajv) "sò frej").
4. La tradussion as les con la recension ëd la Volgata Lucianica greca an ebràich: הַתְחִּלהַ hatëchilha, "la làuda, l'inn, salm") pitòst che la letura dël TM ִהַתְּחִלָּה֙ (hatëchillah, "ël prinsipi").
5. La tradussion a les con chèiche manoscrit ebraich medieval e la Pessità aramàica וּמִבִבוּמֵי (umibbume, "e chèiche dissendent ëd...") pitòst che 'l TM che a les וּבֵּי (uvne, "e ij fieuj ëd...").
6. La tradussion a les   וְגֵי (vëgey, "e la valada") pitòst che 'l TM che a les גֵּי (gey, "la valada"). Ël vav congiunsion original (ו) a l'é fàcil ch'a sia tombà për aplografia.