Michea

3

Nosgnor a giudicherà ij cap ëd Giuda

¹Mi 'v diso: “Scoté da bin, vojàutri ch’i governeve ‘l pòpol ëd Giacòb, ij cap ëd la ca d’Israel! I dovrie bin savèj lòn ch'a l'é giust. ²Tutun, i l’eve 'n ghignon lòn ch'a l'é bon e av pias lòn ch'a l'é gram; voi i scortieve la pel ëd mia gent e i rancheve la carn dai sò òss. ³Vojàutri i divore la carn ëd mè pòpol, i gaveve soa pel e i craseve ij sò òss; për vojàutri a l'é coma 'd friceuj ant na pèila, coma 'd bujì ant na marmita. ⁴A vnirà 'l di che sti pecador a crijeran e a suplicheran ël Signor ch'a-j salva, ma chiel a-j scotrà pà nen. Ant col temp-là Dé a stërmerà soa facia da lor për le gramissie ch'a l'han fàit".

⁵Sossì a l’é lòn ch’a dis ël Signor an parland contra dij profeta ch’a dëstorno mè pòpol e ch’a son bon com ëd mòrt: “Se cheidun av paga bin, i seve dispòst a profetisé la pas, ma se cheidun av paga nen pro, i-j feve la diciarassion ëd guèra! ⁶A l'é parèj ch'av drocherà adòss la neuit e i arsèivreve pì gnun-a vision. A vnirà scur e i podreve pa pì lese le gàbole. Ël sol a tramontrà an su costi profeta e la lus dël di a vnirà top dzora 'd soa testa. ⁷Ij profeta a saran dësvergognà, coj ch'a leso le gàbole a n'avran onta. Tùit lor as quatran la boca përchè a arseivran gnun oràcol da Nosgnor". ⁸Mi, nopà, grassie a lë Spirit ëd Nosgnor, i sarai pien ëd fòrsa, ëd giustissia e ‘d valentisa për denunsié a Giacòb soa 'nfedeltà, sò pëccà a Israel.

⁹Sté a sente, donca, lòn ch’i diso, voi, ij governant dël pòpol ëd Giacòb, ij cap ëd la ca d’Israel, vojàutri ch'i l'eve an ghignon la giustissia e i përvertisse tut lòn ch'a l'é giust, ¹⁰che i slarghe Sion con ëd crimen sagnos, e Gerusalem al pressi d’angiustissie! ¹¹"Ij sò giùdess a pronunsio 'd sentense dòp d'avèj ciapà 'd bej cadò, ij sò sacerdòt a fan ëd servissi sacrà mach për vagné, e ij sò profeta a leso le gàbole për na paga". Tutun lor a diso: "Ël Signor a l'é an tra 'd noi. Ëd dësastr a peudo pa capitene". ¹²Për colpa vòstra, giustament, Sion a sarà sarbià tanme 'n camp^[1], Gerusalem a vnirà un baron ëd ruin-e e ël Mont dël Templi a vnirà na colin-a pien-a 'd ronze.

Nòte

↑ Cfr. Geremìa 26:18.

[1] Cfr. Geremìa 26:18.

[1]