La Bibia piemontèisa/Testament Vej/Genesi/Genesi 13

Da Wikisource.
Jump to navigation Jump to search

13[modifiché]

Abram e Lòt as separo[modifiché]

1Parèj Abram a l’avìa chità l’Egit e a l’era artornà ant ël Neghev ansema a soa forma, Lot, e tùit ij sò ben. 2Abram a l’era në sgnor: a l’avìa motobin ëd bes-cie, d’argent e d’òr. 3Dal Neghev a l’era andasne, a tape, fin-a a Betel, ant ël midem leugh andoa na vira a s’era acampasse, an tra Betel e Ai. 4Sto-sì a l’era ‘l midem leugh andoa ch’a l’avìa butà an pé na mongiòja e 'nvocà ‘l nòm ëd Nosgnor.

5Lot, ch’a lo compagnava, a l’avìa ‘dcò chiel dë strop ëd feje e ‘d vache, e motobin ëd tende. 6Cola tèra, bele con contut lòn, a podìa nen sostenté tant Abram che Lot con tute cole bes-cie ch’a l’avìo tut’ ansema. Nen mach lòn: an cola tèra a-i ero ‘dcò ij Cananita e ij Perisita! 7Coma se sossì a bastèissa nen, ij bërgé d’Abram e ‘d Lòt a l’avìo ‘dcò 'ncomensà a rusaté fòrt an tra ‘d lor. 8Dëdnans a tut sòn, Abram a l’avìa dije a Lot: “I soma dla midema famija, a venta pa rusaté 'n tra ti e mi, an tra ij mè bërgé e ij tò. 9L’has-to pa miraco dëdnans a ti tut ël pais? Sern cola part dël pais ch’it veule e separomse. S’it veule la tèra ch’a-i é a mancin-a, antlora mi im pijo cola ch’a-i é a drita. Se nopà it veule la tèra ch’a-i é a drita, antlora mi i andrai a mancin-a".

10Parèj Lòt a l’avìa dàit në sguard a le pian-e drue dla val dël Giordan an diression ëd Sòar. Cola region antrega a l’era bin seivà daspërtut, tanme l’Eden, ël vërzé ‘d Nosgnor, o la bela tèra d’Egit. Sossì a l’era anans che Nosgnor a l’avèissa dëstrut Sòdoma e Gomora. 11Donca, Lòt a l’avìa sernù la pian-a dël Giordan e a l’era 'ndass-ne a orient. Parèj a s'ero separasse. 12Abram a s’era stabilisse 'nt ël pais ëd Canaan, e Lòt a l’avìa tramudà soe tende 'nt un leugh davzin a Sòdoma, e a s'era stabilisse 'n tra le sità dla pian-a. 13La gent ëd cola sità, a l’era motobin depravà: e 'l tren ëd vita ‘d lor-lì a ofendìa[1] moto bin Nosgnor.

14Nosgnor a l’avìa dije a Abram, apress che Lòt a s’era separasse da chiel: “Dal leugh anté ch’it ëstas, varda a nòrd e a sud, a orient e a ocident. 15Tut ël pais ch’it vëddé i lo darai për sèmper a ti e a toa dissendensa. 16Mi i moltiplicarai moto bin ij tò dissendent che, 'me la póer ch’a-i é 'n sla tèra, a podran gnanca esse contà! 17Va, e traversa tuta sta tèra an minca diression: mi i la darai a ti”. 18Parèj, Abram a l’avìa tramuvà sò acampament a Hebron e a s'era stabilisse davzin a la Ròl ëd Mambrè. Ambelelà chiel a l’avìa butà 'n pé n’àutra mongiòja për Nosgnor.

Artòrn a la Tàula dla Bibia


  1. O “dësgustava”.