La Bibia piemontèisa/Testament Vej/Esechiel/Esechiel 8

←Esechiel 7

La Bibia piemontèisa Esechiel

Esechiel 9→

La Bìbia piemontèisa - Esechiel 08

Esechiel

8

Idolatria ant ël Templi

¹La sesta anada da la deportassion ëd Jeconìa, ël sinch dël mèis ch'a fà ses, antramentre che mi i j'era setà drinta 'd ca mia, con dë 'dnans j'ansian ëd Giuda, la man ëd Nosgnor a l’ha ambrancame^[1]. ²E vardè lòn che i l'hai vëddù: a l’era na figura ch’a smijava a n'òm. Da lòn ch’a smijava soa vita an giù, a l’era parèj dël feu. Da la vita an sù a splendrìa coma l'argent afoà^[2]. ³Cola figura a l'ha dëstendù coma na forma 'd man e a l'ha rancame për ij cavej. Anlora, an cola vision mandà da Nosgnor, sò Spìrit a l'ha fame aussé an tra tèra e cél e a l'ha transportame a Gerusalem. I son artrovame drinta la pòrta intérna a nòrd dla sità, andova ch’as trovava na statua che a l'era n'ofèisa a Nosgnor midem^[3]. ⁴A l’amprovista a l’é manifestasse la presensa gloriosa^[4] dël Rè d’Israel, pròpi com i l’avìa vëddula ant la pian-a^[5]. ⁵Nosgnor a l’ha dime: “Esechiel^[6], varda anvers ël nòrd”. E mi i l'hai aussà j'euj e i l'hai vëddù n'autar che a dasìa ansima a na mistà pagan-a, cola ch’a l’avìa tissà la gelosìa 'd Nosgnor. ⁶E chiel a l'ha dime: "Fieul d’òm, vëddes-to lòn ch’a fan? J'Israelita as dan a pràtiche scrose. I son obligà a chité mè Santuari. Ma 't vedras d'assion ch'a faran na vira pì scheur! " ⁷Antlora a l'ha mname a la pòrta dl'andron, e i l'hai vëddù: a-i j'era un pertus ant la muraja. ⁸E a l'ha dime: "Fieul d'òm, traversa la muràja!" Mi i l'hai dëstraversà 'l mur, e i l'hai dëscorvù na pòrta. ⁹A l'ha dime: ‘Intra e beica 'l mal abominàbil ch'a fan ambelessì’. ¹⁰I-i son intrà e i l’hai vëddù ‘d rapresentasion d’ògni sòrt ëd reptij e d’àutre bestie abominàbij, tùit j’idoj d’Israel, ch’a l’ero placà an sle muraje tut d’antorn. ¹¹Stanta òm dj’ansian d’Israel, con an mes Jasania, fieul ëd Siafan, minca un a l’avìa un turìbol an man ch’a fasìa na nivola d’ancens ch’a montava dzora ‘d soe teste.

¹²Parèj Nosgnor a l’ha dime: “Fieul d’òm, é-lo ch’it l’has vëddù lòn ch’a fan ij prinsipaj d’Israel con ij sò idoj ant ëd stansie scure? Lor a diso: ‘Tant, Nosgnor a lo vëdd pa. Nosgnor a l’ha chità ‘l pais!’. ¹³E a l’ha dime ancora: “Ven, e it farai vëdde d’abominassion fin-a pes che cole!”.

¹⁴Antlora a l’ha portame a l’intrada dla pòrta nòrd dël Templ ëd Nosgnor, andova ch’a j’era ‘d fomne setà ch’a pioravo për ël dio Tamuz. ¹⁵A l’ha dime: “Has-to vëddù lòn, fieul d’òm? Ma ancora ti ‘t vëdras d’abominassion bin pes che cole-lì”.

¹⁶Peui a l’ha portame ancora ant l’andron interior dël templ ëd Nosgnor. A l’intrada dël Santuari ëd Nosgnor, an tra ‘l vestibol e l’autar, a-i era apopré vinte-sinch òm ch’a dasìo la schin-a al Santuari ëd Nosgnor e ch’a l’avìo la facia virà vers orient: as prostërnavo an adorand ël sol!”. ¹⁷Nosgnor a l’ha dime: “Has-to vëddù, fieul d’òm? A la gent ëd Giuda a-j parëss pòca ròba j’abominassion ch’as comëtto ambelessi! Apress d’avèj ampinì ‘l pais ëd violense e d’avèj provocà mia flin-a, varda coma as buto dë 'dnans ëd mi për ofend-me an facia. ¹⁸Donch, ëdcò mi i-j rëspondrai dëscadnand mia fùria. I l’avrai gnun-a pietà ‘d lor e i-j përdonrai nen. Bele se am faran d’anvocassion dësperà, i jë scotrai pa”.

Nòte

1. O “a l'é tombà dzora 'd mi”.
2. Cfr. Esechiel 1:27.
3. O “ch’a l’avìa rendù Nosgnor motobin gelos”.
4. O “glòria”.
5. Cfr. Esechiel 1:28.
6. O “fieul d’òm”.