Esechiel

41

La part d’andrinta dël templi

¹Anlora col òm a l'ha fame intré ant ël cheur dël santuari e a l'ha mzurane ij pilastr: a l'ero largh des pé liprand valadì ses cùbit, tant da na part che da l'àutra. ²La larghëssa dl'intrada a l'era 'd des cùbit e ij fianch ëd la pòrta sinch cùbit da na banda e sinch da l'àutra. Peui a l'ha pijàit le mzure 'd tut antregh ël santuari: a l'era longh quaranta cùbit e largh vint.

³Passà peui andrinta a l'ha mzurà ij pilastr dla pòrta: set cùbit. La pòrta: ses cùbit; la larghëssa dla pòrta: set cùbit. ⁴A l'è stàita mzurà ancora la longhëssa, vint cùbit; la larghëssa dlë spassi dë 'dnans dël santuari a l'era 'd vint cùbit. Peui a l'ha dime: Costì a l'é 'l Leugh Santissim^[1].

⁵Anlora a l'ha pijà lë mzure dël mur dël templi: ses cùbit; peui ancora la larghëssa dla costrussion central: quat cùbit, tut d'antorn dël templi. ⁶Jë stansin ëd fianch a l'ero un dzora dl'àutr, tranta për tre pian. A-i j'ero peui ëd cele tut d'antorn, as pogiavo a la muraja dël templi: scasi nicie colegà an tra 'd lor ma nen colegà al mur dël templi. ⁷An montand d'un pian a l'àutr l'amplor djë stansin a aumentava, për lòn la costrussion a l'era pì larga anvers dl'àut. Dal pian teren as podìa montesse al pian ëd mes e da costì al pian pì àut.

⁸I l'hai vëddù d'antorn dël templi n'elevament. Le fondamenta dl'edifissi ëd fianch a l'ero d'un trabuch antregh da ses cùbit. ⁹La larghëssa dla muraja esterna dla fàbrica central a l'era 'd sinch cùbit, parèj dlë spassi che a-i restava. An tra la costrussion lateral dël templi ¹⁰e le stansie a-i j'era na larghëssa 'd vint cùbit d'antorn dël templi. ¹¹Le pòrte dla costrussion ëd fianch a restavo an slë spassi lìber; na pòrta a dasìa a tramontan-a e un-a a mesdì. Lë spassi lìber a l'era 'd sinch cùbit tut d'antorn.

¹²La costrussion ch'a l'era an facia dlë spassi lìber an sla banda 'd ponent, a l'avìa stanta cùbit ëd larghëssa; la muraja dla costrussion a l'avìa, tut d'antorn, në spessor ëd sinch cùbit; soa longhëssa a l'era 'd novanta cùbit. ¹³Peui a l'ha mzurà 'l templi: a l'era longh sent cùbit; lë spassi lìber, edifissi e soe muraje, ëdcò lor sent cùbit. ¹⁴L'amplor ëd la faciada dël templi con lë spassi lìber, sent cùbit. ¹⁵A l'ha 'dcò mzurà la larghëssa dl'edifissi an facia a lë spassi lìber ant la part darera, con le galerìe dë dsa e dlà: sent cùbit.

La part d'andrinta dël santuari, sò vestìbol, ¹⁶jë stibi, le fnestre a grija e le galarìe tute d'antorn ai tre fianch, a ancaminé da la seuja, a l'ero arvëstìe 'd tàule 'd bòsch, tut d'antorn, dal paviment fin-a le fnestre ch'a l'ero velà. ¹⁷Da l'intrada, drinta e fòra dël templi e ansima a tute le pareti interne e esterne a-i j'ero ëd frësche ¹⁸ëd cherubin e 'd palme. An tra cherubin e cherubin a-i j'era na palma; tùit ij cherubin a l'avìo dòi visagi: ¹⁹la facia 'd n'òm anvers na palma e l'aspet d'un leon anvers l'àutra palma, tuti piturà d'antorn a tut ël templi. ²⁰Da tèra e fin-a dzora dla pòrta d'intrada a l'ero stàit butà 'd cherubin e palme an sle pareti dël santuari.

²¹Jë stibi dël santuari a l'avìo session quadrangolar. Dë 'dnans al Sant dij Sant a-i j'era cheicòsa parèj ëd ²²n'autar ëd bòsch, àut tre cùbit, dòi cùbit ëd longhëssa e largh dòi. Ij canton, l'ampeduss e ij fianch a l'ero ëd bòsch. Anlora l’òm a l'ha dime: “Costa a l'è la tàula che a stà dë 'dnans ëd Nosgnor”.

²³Ël santuari e 'l Leugh Santissim a l'avìo mach doe pòrte a pr'un. ²⁴Minca na pòrta a l'avìa dòi batant e tùit ij batant a s'ardobiavo an dòi tòch: dòi për un batant e dòi për l'àutr. ²⁵An sle pòrte a l'ero piturà 'd cherubin e 'd palme parèj com an sle pareti: un portal ëd bòsch a l'era an sla faciada dl'andron ëd fòra. ²⁶Fnestre e grije e palme a l'ero da tute doe le part, ai fianch dël vestìbol, a jë stansin anëttù al templi e a j'arsivòli.

Nòte

↑ O “Sant dij Sant”,

[1] O “Sant dij Sant”,

[1]