La Bibia piemontèisa/Testament Vej/Esechiel/Esechiel 3

Da Wikisource.
Jump to navigation Jump to search

Esechiel[modifiché]

3[modifiché]

Esechiel instruì riguard a soa mission da profeta[modifiché]

1A l'ha dime: "Fieul d'òm, lòn che a l'é presentate, ti mangilo, mangia cost ròtol, e và a parlè a Israel". 2Mi i l'hai dovertà la boca e a l'ha fame mangé ‘s lìber, 3damentre ch’am disìa: “Fieul d'òm, ampiniss-te le ventraje e arpata toa pansa con lë scrit ch’it t'hai date”. Antlora i l'hai mangialo e an mia boca a l'era pì doss dl'amel.

4Peui chiel a l'ha dime: "Fieul d'òm,va da j'israelita e arferissje mie paròle, 5Mi it mando nen a 'n pòpol dal lengagi misterios e 'd lenga ch’a sia malfé da comprende, ma a j'israelita. 6It mando nen a ‘d pòpoj ch’a parlo ‘d manera ch’as capiss nen o ‘d lenga tant malfé ch’it l’antendrie nen. S’it l'avèissa mandate da lor, lor a l'avrìo bin scotate; 7ma j'Israelita at voreran nen ëstete a sente, përchè a l’é mi ch’a veulo nen ëscoté: a son ëd gent teston-a e dal cheur ëd pera. 8Ma varda, it dago ‘dcò a ti na facia 'd tòla parèj dla soa e na front dura tanme la soa. 9I l'hai fàit ëdventé toa front coma s'a fussa 'd diamant, pì dura dla pera. Ch'it l'abie nen tëmma 'd lor, sbaruv-te nen ëdnans a lor; a son un pòpol d'arviros”.

10A l'ha 'ncor dime: “Fieul d'òm, arsèiv ant ël cheur e scota tute le paròle ch’it diso, 11peui va a trové ij tò compatriota deportà e parlje. Sìa ch’a të scoto o ch’at ëscoto nen, ti dije: ‘Sossì a l’é lòn ch’a nunsia ‘l Signor Dé’”.

Esechiel con ij deportà an Babilònia[modifiché]

12Antlora n'ëspìrit a l'ha levame an àut e darera 'd mi i l'hai sentì na gran vos ch’a disìa: "Ch'a sia benedìa la glòria dël Signor dal leu 'd soa ca!”. 13I l’hai ‘dcò sentì 'l ciadél ëd j'ale dj’esse vivent ch’a-j batìo l’un-a contra l'àutra e a l'istess temp ël fracass ch’a fasìo le roe ch’a ‘ndasìo con lor, e ‘l braj d’un gran taramòt. 14 Donca, lë Spìrit a l'ha levame an àut e mname via. La man ëd Nosgnor a peisava 'dzora 'd mi. I son tornà a esse sagrinà e con ël cheur andeulorì. 15e i son rivà da j'esilià 'd Tel-Aviv, che a stasìo arlongh ël canal Chebar, andova a l'avìo pijà residensa e i son ëstàit con lor set di, coma s’i fussa stordì.

Ël profeta sentinela d'Israel[modifiché]

16Passà ch’a j’ero sti set dì, Nosgnor a l’ha comunicame soa paròla. A l’ha dime: 17Fieul d'òm, mi i l'hai butate coma sentinela dël pòpol d'Israel. Tute le vire ch’it sentiras da mia boca un crij d’alarme, ti it dovras avertije da mia part. 18Se mi i mnasso ‘l përvers disendje: “Ti it muireras!” E ti it lo averte nen përchè 'l përvers a chita ‘l senté dël mal e a salva soa vita, chiel, ël përvers, a meuirirà për soa colpa, ma 'd soa mòrt mi i ciamerai cont a ti[1]. 19Ma se ti, a l’opòst, it bute an vardia 'l përvers e chiel a së slontan-a nen da soa gramìssia ni a chita ‘l senté dël mal, chiel a meuirerà për soa colpa, ma ti it t’avras salvate la vita. 20Parèj, se n'òm giust a së slontan-a dal bon senté e a fà 'd gramìssie, mi i buterai n'antrap ëdnans a chiel e chiel a meuirerà; dal moment che ti it l'has nen butalo an vardia, a meuirerà për sò pëccà e j’euvre giuste ch'a l'avìa fàit a saran pì nen arcordà; ma 'd soa mòrt mi i ciamerai cont a ti. 21Se tì, nopà, it l'avras butà an vardia 'l giust ëd nen pëcché e a pëcca nen, chiel a vivrà, përchè ti ‘t l’has avertilo e ti’t l’avras salvate la vita".

Giudissi ‘d Nosgnor dzura Israel[modifiché]

22Pròpi ambelelà la man ëd Nosgnor a l’ha torna ‘mbrancame. Chiel a l’ha dime: “Seurt e va ant la pian-a e là it parlerai. 23Parèj i son seurtì e andàit a la pian-a. Ambelelà i l’hai vëddù la presensa gloriosa ‘d Nosgnor pròpi coma i l’avìa vëddula an sla riva dël canal Chebar, e i son prostërname con la front a tèra. 24Antlora lë Spirit a l'é intrà 'ndrinta 'd mi, a l'ha fame aussé e a l'ha dime: “Va e sarte ‘ntëcà. 25A ti, fieul d’òm, at buteran acòl ëd còrde, it saras gropà e it podras pì nen seurte da 'n mes a lor. 26It ancolerai la lenga al palà e it resteras mut, parèj it saras pì nen për lor un che a-j arpròcia përchè a son na gineuria d'arviros. 27Ma quand peui it parlerai, it durbirai la boca e ti it jë diras: “A dis ël Signor Dé: ‘Chi a veul ëscoté ch'a scota e chi a veul nen ëscoté ch'a scota nen”; përchè a son na gineuria d'arviros.

Nòte[modifiché]

  1. An ebràich:"I sercherai sò sangh ant la toa man".