La Bibia piemontèisa/Testament Vej/Cronache/1Cronache 26

←1Crònache 25

La Bibia piemontèisa Ij lìber dle Crònache

1 Crònache 27→

1 Crònache

26

Ij dovej dij guardian

¹Coste-sì a son le distribussion ëd ij guardian:

Ij Coraita: Meselemia, fieul ëd Core, dij fieuj d' Asaf. ²Fieuj 'd Meselemia: Zecaria, 'l prim-nassù, Jediael, lë scond, Zebadia 'l ters, Jatniel, ël quart, ³Elam ël quint, Jeocanan ël sest, Elieoenai, ël sétim. ⁴Obed-Edom e ij sò fieuj: Semaià 'l prim-nà, Jeosabad lë scond, Joach ël ters, e Slacar, ël quart Netanel ël quint, ⁵Amiel ël sest, Issacar ël sétim, Peuletai ch'a fà eut: Nosgnor, an efet, a l'avia benedì Obed-Edom. ⁶E a sò fieul Semaià a l'ero nassuje 'd masnà che a saran cap ant la casà dij sò pare, përchè òm 'd valor. ⁷Fieuj 'd Semaià: Otnì, Refael, Obed, Elsabad, e ij sò frej Eliù e Semachia, òm vajant. ⁸Tùit costi ij dissendent d'Obed-Edom. Lor e sò fieuj e frej a l'ero d' òm ëd valor e ëd fòrsa për ël servissi. Për Obed-Edom: sessantadoi. ⁹Meselemia a l'avia avù fieuj e frej, òm ëd valor, a l'ero disdeut. ¹⁰Da ij fieuj 'd Còssa, fieul ëd Merari: Simrì 'l cap ëd tuit, che combin a fùissa pa prim-génit, sò pare a l'ha atribuije 'l prim pòst. ¹¹Chilchia, scond, Tebalia, ters, Zecaria, quart. Tùit ij fieuj e frej 'd Còssa: an tut a fasio tërdes.

¹²Coste class ëd guardian, tant ij cap parej dj'àutri, a l'avio 'l dovej 'd servì la pòrta al Templ ëd Nosgnor. ¹³Për minca na pòrta, as fasìa ‘l sortegg për famija, ch'a sia cita o gròssa. ¹⁴për l'Est, la sòrt a tomba ansima a Selemiau,che 'l fieul Zecariau a l'é stait consijé avosà. ¹⁵A son tirasse le sòrt për ël Nòrd e a son tombà dzora a cost derié. Al Sud Obed-Edom, e ij sò magasin ai fieuj. ¹⁶Supim e Cossà a l'han avù l'Ossident con la Pòrta dël "Bion abatù" an sla montà de dzora. ¹⁷Ël servissi 'd vardia a l'é dëstribuisse përparej: a la pòrta Oriental a-i j'ero ses levita; cola 'd Tramontan-a, ses al di; cola 'd Meridion: quat, doi për doi ai magasin. ¹⁸A le dipendense dla pòrta Òvest a i na j'ero quat për ël caminament e doi për ël Parbar^[1]. ¹⁹Costi-sì a son stait ij portié an tra ij Coreita e ij Merarita.

Ij tesoré e d’àutri ufissiaj

²⁰Ij Levita e sò frej, a tnisìo an guerna ‘l tesòr dël Templ ëd Nosgnor, e a l'ero responsàbij dj'asi sacrà ij pì pressios. ²¹Ij fieuj ëd Ladan, dël clan ëd Gherson, a l'avio ij Jechielita për cap ëd Ladan, Ghersonita. ²²Ij fieuj ëd Jehiel: Zetam e sò frel Joel a l'ero guardian dij tesòr dël Templ ëd Nosgnor. ²⁴An tra ij dissendent d'Amram, d'Isear, d'Ebròn e d'Usiel: ²⁴cap tesorié a l'é stait Sebuel, fieul ëd Gherson, ch'a dëssendìa da Mosé. ²⁵An tra ij sò frej, dla linea d'Elieser: sò fieul Recabià, Jsaiau, Joram, Zicrìe Selòmt. ²⁶Cost Selòmt con ij sò frej, a guernava 'l tesòr che re David, ij cap dle casà, ij cap responsàbij dle milen-e e'd senten-e e ij generaj dl'esércit ²⁷a l'avio consacrà a Dè da le piàite dle guere, për manten-e 'l Templ ëd Nosgnor. ²⁸Nen mach, ma tut lòn che Samuel, ël profeta, Saul fieul 'd Chis, Abner fieul ëd Ner, e Giòab, fieul ëd Seroià, a l'avio consacrà a Dé; tuti costi asi sacrà a dëpendio da Selòmt e sò frej. ²⁹An tra ij dissendent d'Isar: Chenania a s' ocupavo, tanme scriba e giùdes, d'afé civij. ³⁰Për j'Ebronita, Casabià e ij sò milaesetsent frej , òm vajant, a aministravo j'aféreligios e dël re, da la banda ocidental dël Giordan. ³¹An tra ‘l clan d'Ebron, a-i j'era Ierià. L'ann ch'a fa quaranta dël regn ëd David, a son fasse d'arserche an sle genealogie 'd sò casà; a son s-curvisse d'òm ëd valor a Jaser ëd Galad. ³²Për lòn che a rësguarda ij frej 'd Ierià, doimilasetsent guerié cap ëd famije, che re David a l'avia daje podej an sij Rubenita, ansima ai Gadita e a la mesa tribù 'd Manasse, per tuit chis-cion ëd Nosgnor e dël re.

Nòte

1. Parbar: significà difìcil da volté e capì.