La Bibia piemontèisa/Testament Vej/Cronache/1Cronache 23
1 Crònache[modifiché]
23[modifiché]
Ij dovej dij Levita[modifiché]
1Ant ij di ‘d soa vejëssa, David a l’ha nominà Sò fieul Salomon rè d’Israel. 2A l’ha donca convocà ij cap d’Israel ansem ai sacerdòt e ai Levita. 3A son contasse tùit i Levita ch’a l’avìo trant agn an sù, e sò nùmer a l’é rivà a 38.000. 4Peui David a l’ha dit: "Ëd costi-sì a saran sernù 24.000 për l'atività[1] dël Templ ëd Nosgnor. D’àutri 6.000 a serviran da ufissiaj e giùdess 54.000 a serviran da guardian, e 4.000 a laudran Nosgnor con jë strument musicaj ch’i l’hai fàit”. 6Peui David a l'ha dividùje an ëstrop, corispondent ai tre dissendent ëd Levi: Gherson, Cheat e Merari.
Ij Ghersonita[modifiché]
7J’unità dla famija ghersonita a l'é stàita definìa da soe linee ‘d dissendensa da Ladan e Simì, ij fieuj ëd Gherson. 8Tre dij dissendent ëd Ladan a j’ero Iechiel (ël cap famija), Setam e Gioel. 9Costi-sì a l’ero ij cap ëd la famija ‘d Ladan.
Tre dij dissendent ëd Ladan a j’ero Selomit, Casiel e Aran. 10Quatr dj’àutri dissendent ëd Simì a l’ero Iacat, Zisa, Ieus e Beria. 11Iacat a l'era 'l cap ëd famija, Zisa lë scond; Ieus e Beria a a l’ero contà coma na famija ùnica përchè a l’avìo avù pa vàire fieuj.
Ij Cheatita[modifiché]
12Cheat a l'avia avù quat fieuj: Amram, Isar, Ebron e Usiel.
13Ij fieuj d'Amram a son ëstait Aron e Mosè. Aron e ij sò dissendent a son ëstait sernù për semper al ministeri ant ël leu pì Sant, për brusé d'ancens ant ël Templi, për ël servissi a Nosgnor e për benedì la gent ant ël nòm dël Signor fin-a a la fin dij temp.
14Për lòn ch’a riguarda Mosè, ij sò fieuj a son ëstàit anserì ant la tribù ‘d Levi. 15Ij fieuj ëd Mosè a l’ero Ghersom e Elieser. 16Ij dissendent ëd Ghersom a 'ncludìo Sebuel, ël cap famija. 17Elieser a l’avìa mach un fieul, Recabià. Recabià a l’ha avù na dissendensa bondosa.
18Ij dissendent d’Isar a comprendìo Chelomit, ël cap famija.
19Ij dissendent d’Ebron a comprendìo Jeria (ël cap famija), Amaria (lë scond), Jacasiel (ël ters), e Jecameam (ël quart).
20Ij dissendent ëd Usiel a comprendìo: Mica (ël cap famija) e Isià (lë scond).
Ij Merarita[modifiché]
21Ij dissendent ëd Merari a comprendìo Maclì e Mossì.
Ij fieuj 'd Maclì a j’ero: Eleasar e Chis. 22Eleasar a l'é mòrt sensa fieuj; tant a l'avia mach ëd fije che a son mariasse con ij cusin ëd lor: ij fieuj 'd Chis.
23Tre dij dissendent ëd Mossì a l’ero: Mali, Eder e Gerimòt.
24Costi-sì a son ij dissendent ëd Levi conform ai sò clan, ij cap ëd lignagi, registrà con soen për nòm. Minca un ëd lor a l’avìa da avèj vint agn an sù për qualifichesse për ël servissi ant la ca ‘d Nosgnor. 25David, an efet, a l'avia dit: "Nosgnor, Dé d'Israel, a l'ha conceduje arlas a soa gent e a l'ha stabilì soa abitassion a Gerusalem për sèmper. 26Dcò ij levita a l'avran pa pì da tramudé 'l Tabernàcol, nì j'asi për sò servissi”. 27A l'era stait conform a le dariere dësposission ëd David, tùit ij Levita da vint ani an su, a l’ero stàit anregistrà për ël servissi.
28L’euvra dij Levita a l’era ‘d giuté ij sacerdòt, ij dissendent d’Aron, damentre ch’a servìo ant la ca dël Signor. Lor a guernavo ‘dcò le cort, le stansie, la purëssa ritual ëd tuti j'asi sacrà, e a pijavo part al servissi religios ant ël Templi 'd Dé. 29Lor a l’avìo da pijesse soèn dël pan sacrà ch’a l’era butà an sla tàula, ëd la farin-a soasìa për l’oferta dël gran, le fogasse sensa alvà, lòn che a j'era da barghisé[2] an sla grija, la ròba da fricassé e tute le mzure cite e gròsse. 30Minca na matin e tute le seire a dovio fé assistensa al Templi, për rendje grassie a Nosgnor e laudelo. 31A prëstavo assistensa con j’olocàust ch’a l’ero smonù al Signor ant ij Sabat, ant le celebrassion ëd la lun-a neuva, ant le feste comandà. Ël nùmer ëstabilì dij Levita a servìa a la presensa dël Signor an minca temp, ëscond le procedure ch’a l’ero stàite dàite a lor.
32Parèj, sota la supervision dij sacerdòt, ij Levita a l’avìo da guerné ‘l Tabërnàcol[3] e ‘l Templi e compì con fidelità tùit ij dover ëd sò servissi ant la ca ‘d Nosgnor.