La Bibia piemontèisa/Testament Vej/Cronache/1Cronache 20
1 Crònache
[modifiché]20
[modifiché]Assedi e pijàita 'd Raba
[modifiché]1Tornà la prima, ant la stagion che ij rè a seurto për fé la guera, Ioab a l'ha mnà n'armeja fòrta contra dj’Amonita e a l'ha vastane 'l pais. Peui a son ëvnùit a assedié Raba antramentre che David a stasìa ancora a Gerusalem[1]. 2David a l'ha gavaje da la testa 'd sò rè la coron-a, e a l'ha trovà che a peisava un talent d'òr, e a-i j'era 'd pere pressiose. A l'é staita butà an sla testa 'd David, che a l'ha dcò mnà da la sità na gran caterva 'd pijàita. 3Fait seurte la gent che as trovava là, a l’é fass-ne dë s-ciav forsàndje a travajé con ressia, erpi ‘d fèr e assul[2]. Përparej a l'ha fait David a tute le sità dj'Amonita. Peui con tuta soa gent a l'é tornass-ne a Gerusalem.
Guère contra ij Filisté
[modifiché]4Dòp ëd tut sòn, a l'é rivaje na guèra a Gheser contra ij Filisté. Antlora Sibecai, l'Usatita, a l'ha massà Sipai, dla rassa dij gigant[3] ëd Rafa. E ij Filisté a son ëstait umilià.
5A-i é staie peui, ancora n'àutra bataja con ij Filisté, andova che Elcanan, fieul ëd Iair, a l'ha colpì Lacmi, frel ëd Golia 'd Gath[4], che a l'avìa l'asta dla lansa gròssa 'me un subi[5] da tëssior!
6N'àutr combatiment a l'é dcò staie a Gath. A-i j'era n'òm grand e gròss che a l'avìa ses dij për man e pé, an tut vintequatr dij: dcò chiel a l'era dla rassa dij gigant refaita. 7E a l'ha sfidà Israel, tutun Giònatan, fieul ëd Simea a l'ha massalo.
8Costi-sì a l'era stàit ij dissendent ëd la rassa dij gigant refaita an Gath, ma tùit a son ëstàit massà da David e da ij sò guerié.
Nòte
[modifiché]- ↑ Ël test paralel ëd 2 Samuel a parla dla conta'd Betsabea e Uria. Cfr. 2 Samuel 11:1.
- ↑ N’àutra tradussion a sugeriss che cost versèt a sarìa da 'ntende che David a l’avrìa sogetà cola gent a ‘d torture: “a l'ha condanaje al suplissi dle ressie, dle roe e dij piolet” o “erpi, galavia e rubat”.
- ↑ Ij dissendent dij Refaita; ëdcò an 20:6, 8.
- ↑ Cfr. 1 Samuel 17:4-7.
- ↑ O “subia”.