La Bibia piemontèisa/Testament Vej/Cronache/1Cronache 10

←1Crònache 9

La Bibia piemontèisa Ij lìber dle Crònache

1 Crònache 11→

1 Crònache

La Bìbia piemontèisa - 1 Crònache 10

10

Bataja 'd Ghilboa e mòrt ëd Saul

¹Ij Filisté a l'han tacà bataja contra d'Israel; ma a son scapaje dë 'dnans: vàire a son tombà mòrt an sle colin-e 'd Ghilboa. ²¹Ij Filisté, vnisend anans e anserciand Saul e ij sò fieuj, a l'han massà Giònata, Abinadab e Malchi-Sua, fieuj dël re. ³Peui la sbriva dla bataja a l'é adrëssasse tuta contra 'd Saul: j'arsé a l'han s-ceiralo e ferilo grev. ⁴Anlora Saul a l'ha dije a sò scudié: Tira fòra toa spa e pasme da part a part, ëd manera ch’a sio pa ij nen-sirconcis a feme oltragé. Ma lë scudié, tut sbaruvà, për ël gran’ rispet ch’a l’avìa për chiel, a l'ha pa fàit përparej. Anlora Saul, ciapà soa spa a l'é campassje ansima. ⁵ Ore, ant ël moment che lë scudié a l'ha vëddù che Saul a l'era mòrt, a l'é campasse a soa vira ansima a soa spa e a l'é massasse. ⁶E parej che Saul a l'é mòrt con ij sò tre fieuj, e tuta soa dinastia a l'é dësparìa con chiel. ⁷Tuti coj d'Israel, ch'a l'ero ant la comba, cand ch'a l'han vëddù che l'esèrcit israelita a l'era scapà e a l'han savù che Saul a l'era mòrt con ij sò fieuj, a l'han chità soe sità ‘d lor e a son ëscapà a soa vira, përparej ch’ a son ëvnùit a steie ij Filisté.

⁸A l'é rivaje che, ël di dòp, ij Filisté a son ëvnùit a dëspojé ij mòrt e a l'han trovà Saul e ij sò fieuj tombà an sij mont ëd Ghilboa. ⁹A l'han tajaje la testa e gavaje j'arme, ch'a l'han fait porté an gir për ël pais, nunsiand la bon-a neuva ai sò ìdoj e a soa gent ëd lor. ¹⁰Lor a l'han butà j'arme 'd Saul ant ël templi dij sò dio, e a l'han tacà l'òss dël cranio ant ël templi 'd Dagon.

¹¹Dël moment che la gent ëd Iabes ëd Ghilead a l'han antendù lòn che ij Filisté a l'avìo faje a Saul, ¹²dun-a, tuti j'òm vajant a son surtì da la sità e a son andait a arcuperé ij còrp ëd Saul e dij sò fieuj e a l'han portaje a Iabes, peui a l'han sotràne j'òss sota na pianta 'd Màstich ëd soa sità e a l'han fait digiun për na sman-a.

¹³Saul a l'era andait a meuire përchè a l'era nen ëstàit fidel a Nosgnor: chiel a l'avìa pa guernà soa paròla^[1] e a l'avìa evocà carcaveje për mojen ëd la fìsica 'd na masca^[2], ¹⁴nopà 'd consulté Nosgnor. E 'l Signor a l'ha falo meuire, e a l'ha daje 'l regn a David, fieul ëd Iesse.

Nòte

1. Cfr. 1 Samuel 13:8-14; 15:1-24.
2. Cfr. Levìtich 19:31; 20:6; 1 Samuel 28:7-8.