Càntich

2

Un liri tra le spin-e

[Chiel]¹ Mi i son un narsis ëd la pian-a 'd Saron, un liri dle val. ²Coma 'n liri an tra ij card a l'é mia amà an tra le damisele.

[Chila:] ³Coma 'n pomé an tra j'erbo dël bòsch, a l'é mè amà an tra le damisele. Coma ch'am pias a sté sota soa ombra: sò frut a l'é doss al palé. ⁴A l'ha fame intré 'nt ël salon ëd le feste, a l'ha vardame con në sguard ëd grinor. ⁵Deme fòrsa con ëd torta d'uva, sustnime con dij pom: i son malàvia d'amor. ⁶Soa man snistra am carëssa la testa e con la drita am ambrassa^[1]. ⁷Fije 'd Gerusalem, iv suplico, për le gasele e le serve dël camp, dësvijé pa l'amor fin-a a tant ch'a në sia l'ora^[2]. ⁸Scoté, na vos! A l'é 'l mè amà ch'as avzin-a! Vardé, a l'é 'n camin ch'a riva! A ven giù ëd corsa dai senté dle montagne. ⁹A sàuta coma na gasela o coma 'n serviòt! Vardelo-là darera 'd nòstr mur ëd cinta. A l'é rivà; a l'é a la fnestra e a guàita^[3] da le gelosìe. ¹⁰Mè amà a parla e am dis:

[Chiel:] "Àuss-te, amisa mia!, mia bela, e ven via con mi! ¹¹Varda, l'invern a l'é passà, la pieuva a l'é chità, a l'é andass-ne. ¹²Le fior a sponto da la tèra, Ant le vigne a l'é rivà 'l temp ëd la povura. As sent la tórtola ch'a canta për ij camp. ¹³A sponto ij frut verd dij fié, le vigne fiorìe a dan sò përfum. Àuss-te, amisa mia, mia bela, e ven via con mi! ¹⁴Colomba mia, ant le chërpure dla ròca, ant jë stërmaj ëd le rochere, fame vëdde toa facia, fame sente toa vos, përchè toa vos a l'é dossa, e toa facia a l'é bela. ¹⁵Ciapé tute le volp, cole pcite, prima ch'a vasto la vigna dl'amor, nòstre vigne an fior".

[Chila:] ¹⁶"Mè amà a l'é tut mè, e mi i son tuta soa; chiel a pastura lë stròp an tra ij liri. ¹⁷Fin-a a tant ch'a-i riva 'l calé dël sol, e ch'a së slongo j'ombre. ¹⁸Artorna a mi, mè amà, tanme na gasela, o tanme 'n cerv për le montagne 'd Beter".

Nòte

↑ O "am bùstica".
↑ O "fin-a a tant che chiel medésim a lo veuja".
↑ O "a ghicia".

[1] O "am bùstica".

[2] O "fin-a a tant che chiel medésim a lo veuja".

[3] O "a ghicia".

[1]

[2]

[3]