La Bibia piemontèisa/Testament Vej/Age/Age 1

←Sofonia 3

La Bibia piemontèisa Agé

Agé 2→

La Bìbia piemontèisa - Agé 1

1

L'arcostrussion dël templi

¹Lë scond ann dël rè Dario, ël prim di dël quint mèis, la paròla 'd Nosgnor a l'é stàita adressà për ël mojen dël profeta Agé a Zorobabel^[1], fieul ëd Sealtiel, governator ëd Giuda, e a Giosuè, fieul ëd Iosadach, ël grand sacerdòt, an costa manera:

²"Parèj a parla ël Signor ëd l'Univers. Costa gent a dis: 'A l'é 'ncora pa rivà 'l temp d'arcostrùe ël Templ ëd Nosgnor!'".

³Nosgnor, contut, për ël mojen dël profeta Agé, a l'ha comunicà soa paròla e a l'ha dit: ⁴"A vë smija 'l moment dë sté ant le vòstre ca chet, cand che costa Ca a l'é delabrà?" . ⁵Donch, adess parèj a parla 'l Signor ëd l'Univers: 'Penseie da bin a lòn ch'i l'eve fàit! ⁶Vojàutri i l'eve sëmnà tant, ma i l'eve cojù pòch; i l'eve mangià, ma nen da gaveve la fam; vojàutri i l'eve beivù, ma pa fin-a anciocheve; voi i seve vestive, ma nen fin-a a scaudeve. L'ovrié a l'ha avù sò salari për butelo drinta na borsa forà!"

⁷Parèj a parla ancora 'l Signor ëd l'Univers: 'Penseie da bin a lòn ch'i l'eve fàit. ⁸Monté an sël mont, porté 'd bòsch e tiré torna sù mia Ca. Ambelelì i-i butrai mia compiasensa e i manifestrai mia glòria. I lo diso mi, ël Signor'. ⁹Vojàutri i spetave l'abondansa e a l'é rivaje pòch. Lòn che voi i portave antëcà mi i lo sbardlava. E përchè? Për motiv che mia Ca a l'é crovà an ruin-a, tuti vojàutri iv deve da fé për vòstre ca. ¹⁰A l'é për lòn che ij cej a l'han sarave la rosà e 'dcò la tèra a arten soa produssion. ¹¹I l'hai ciamà la suitin-a an sla tèra e ansima le montagne, an sël gran, e an sël vin neuv, an sl'euli e ansima lòn ch'a dà la tèra, ansima a j'òm e a le bestie, e su tùit ij travaj ëd vòstre man.

¹²Adess Zorobabel, fieul ëd Sealtiel, e Giosuè, fieul ëd Iosadach, ël grand sacerdòt, e tuta la rimanensa dla gent a l'han ëscotà la vos ëd Nosgnor sò Dé e le paròle dël profeta Agé, conform a la mission che Nosgnor sò Dé a l'avìa daje. E 'l pòpol a l'ha avù tëmma dë 'dnans a Nosgnor. ¹³Agé, ël messagé dël Signor, a l'ha parlaje con coste paròle a la gent, conform a la volontà 'd Nosgnor. ¹⁴E 'l Signor a l'ha dësvià lë spirit ëd Zorobabel, fieul ëd Sealtiel, fieul ëd Iosadach, ël governator ëd Giuda, lë spirit ëd Giosuè, grand sacerdòt, e lë spirit ëd tut ël pòpol: lor a son ëvnùit e a l'han anandià ij travaj për ël Templi dël Signor ëd l'Univers, sò Dé.¹⁵Sòn a l'é stàit ël vintequat dël sest mèis.

Nòte

1. Cfr. Esdra 4:24-5:2; 6:14.