La Bibia piemontèisa/Testament Vej/Abacuc/Abacuc 1
1
[modifiché]Ël profeta a crija agiùt a Nosgnor
[modifiché]1Presagi che 'l profeta Abacuch a l'ha arseivù an vision.
2"Fin-a che mira, Nosgnor, it ciamrai d'agiut sensa che ti t' më scote? Fin-a che mira i l'avrai da crijé anvers ëd ti: " Am fan ëd violensa!" sensa che ti t'im salve? 3Përchè t 'im fase vëdde la përversità e it reste mach në spetator dël crasament? Mi i vëddo nen d'àutr che dëstrussion e violensa; daspërtut ëd ruse, e 'd gent che a va pa d'acòrdi. 4Dcò la Lege a l'é pa pì rispetà, ël dirit a l'é nen aplicà! Òhi, 'l përvers a pija an bala 'l giust, e dcò ij giudissi a son ësfaussà!".
Ij Caldé: foet ëd Nosgnor
[modifiché]5Nosgnor a dis: "Vardé da bin an tra le gent, beiché, i në sareve stupì e surprèis! Përchè mi i farai dij vòsti di na còsa che mach a contela i-j chërderìe pa[1]. 6Òhi! I farai vnì ij Caldé[2], costa gent ferosa e pien-a 'd feu, coj che a dëstraverso le vàude gròsse dël pais për fesse padron ëd le ca dj'àutri. 7A son tremend e feros, a fisso soa potensa e sò dirit ant la fòrsa! 8Ij sò cavaj a son pì lest che 'd pantere, e a mòrdo pì che ij luv noitej; ij sò sivalié a rivo da leugn, ij sò sivalié a rivo an pressa, lor a vòlo coma l'òja che as campa an sla pijàita për fela a tòch. 9Tùit a rivo për fé 'd ravagi, la facia afoà com un vent ëd levant; lor ambaron-o 'd përzoné parèj ëd sabia! 10Costa gent a dëspresia ij rè, as në rij dij prinsi. le fortësse a jë sbaruvo pa, a j'ambaron-o 'd tèra contra e as jë pijo. 11Peui com un vent che a vira, as në van da n'àutra part. A son ëd criminaj parèj coma tuti coj che'd soa fòrsa as në fan un dio!
12Dai temp pì leugn, ses-to pa ti, Nosgnor, ël mè Dé sant ch' a meuir pa? Ti, la Ròca, tut lolì it l'avìe stabililo për esercité la giustissia, ti it l'avìe fissalo për castighene!
13Ij tò euj a son tròp pur për vëdde 'l mal, ti 't peule pa toleré 'l crasament. Anlora përchè staghes-to a vëdde j'euvre dij përvers, e it të staghe ciuto antant che 'l gram a travonda un pì giust che chiel?
14Ti 't trates j'òm com ij pèss dël mar, tanme la gent che a l'ha pa un padron! 15Ël tiran babilonèis a ciapa tuta la gent con l'amon, a-j tira su con sò griseul, a-j ciapa con le rèj, e a në son motobin content, a son ant la gòj! 16A smon-o dcò sacrifissi a soe rèj, a bruso d'oferte dë 'dnans a sò griseul, përchè con lòn as procuro motobin da mangé e 'd piat savorì e bondos. 17Donch, a-j daran-ne sèmper ël gir a sò griseul sensa fërmesse, an massand la gent, sensa misericòrdia?