La Bibia piemontèisa/Testament Neuv/At/At 6

Da Wikisource.
Jump to navigation Jump to search

J’At dj’apòstoj[modifiché]

6[modifiché]

A stabilisso dij diàcon[modifiché]

1An coj dì lì, coma ch’a chërsìa ‘l nùmer dij dissépoj, ij Giudé ‘d lenga greca ch’a j’ero tra ‘d lor a son lamentasse dij Giudé ‘d lenga ebràica përchè soe vidoe a j’ero lassà da banda[1] ant ël servissi ordinari dla distribussion dle vivande[2]. 2Parèj ij Dódes a l’han ciamà ansema tùit ij dissépoj e a l’han dije: “A va nen bin che nojàutri i lasso da banda la predicassion dla Paròla ‘d Nosgnor për butesse a fé ij taulegiant.3Vardé, donca, mè frèj, ëd serne set òm tra ‘d voi ch’a l’àbio na bon-a arputassion, pien dë Spirit Sant e ‘d saviëssa: a lor i-j daroma cola responsabilità. 4Quant a nojàutri, i seguitroma a ocupesse dla preghiera e dël servissi dla Paròla”. 5Col discors a l’é piasuje a tuta l’adunansa ch’a j’era lì present. Parèj a l’han fàit l’elession ëd Stevo - n’òm pien ëd fèj e dë Spirit Sant - Flip, Pròcoro, Nicànore, Timon, Parmena, e Nicòla, n’òm d’Antiochia ch’a già a l’avìa convertisse al Giudaism[3]. 6A l’han presentaje a j’apòstoj che, dòp d’avèj pregà, a l’han faje l’imposission dle man.

7La Paròla ‘d Nosgnor a seguitava a propaghesse[4] e ‘l nùmer dij dissépoj a chërsìa motobin an Gerusalem, e fin-a ‘n gran nùmer ëd sacerdòt giudé a acetava[5] la fej.

Stevo a l’é arestà[modifiché]

8Ora Stevo, pien ëd fej e ‘d potensa, a fasìa ‘d gran miracoj e ‘d gran prodis an mes al pòpol. 9Ma quaidun ëd la Sinagoga dij S-ciav Liberà, coma ch’a l’era ciamà, a l’é butasse a fé ‘d discussion con chiel. Coj-lì a j’ero ‘d Giudé da Cirene, Lissandria, Cilicia e dla provincia dl’Àsia. 10A podìo nen contrarié[6] la saviëssa e lë Spirit ch’a parlava për sò mojen. 11Antlora a l’han sobornà quaidun ch’a disèissa: “I l’oma sentilo bëstëmmié contra Mosé e contra Nosgnor”, 12Parèj a l’han cissà na solevassion dël pòpol e la reassion dij notabij[7] e dij magister dla lej e a l’han falo aresté, Stevo, e a l’han mnalo dëdnans al Consej. 14Ambelelà a l’han presentà dij testimòni fàuss ch’a disìo: “St’òm-sì a chita nen ëd fé discors ch’a son mach ëd bëstëmie contra ‘l sant Templ e contra la Lej. 6:14 Nojàutri i l’oma sentije dì che col Gesù ‘d Nasareth a dësblerà ‘l Templ e ch’a cambierà le ordinanse ch’a l’ha dane Mosé!”.

16Coma tuti coj ch’a l’ero astà ant ël Consej a l’avìo j’euj fiss sù chiel, a l’han vëddù soa facia splendrienta coma cola ‘d n’àngel.

Nòte[modifiché]

  1. A j’era na discriminassion.
  2. O “d’agiùt ai pòver”.
  3. O “un prosélita”.
  4. O “a chërsìa”.
  5. O “a fasìa ubidiensa”.
  6. O “arziste”.
  7. O “dj’ansian”.