Rino Serra/Tèra mìa/03
Mìa tèra
[modifiché]Costa tèra
Che ancora m 'arcòrda
La slòira del grand
Che decisa squarsava la teppa,
E la cobia
Ed doe vache tut òss,
Che pasie andasìo
Sensa sosta 'nt el di dla calura;
Costa tèra l'ha un nòm!
Costa tèra
Che ij nòstri grand
L'han bagnà co 'l sudor
Ed soa front
Da milant'agn a sta part;
Costa tèra l'ha un nòm!
Costa tèra
Che 'l paisan a travaja
Con tut el sò amor
Pa curand-se
Dla pieuva del vent o del sol;
Costa tèra l'ha un nòm!
Costa tèra
Giojosa 'nt el giugn
Ant el messon del sò òr
E ant l'otogn
Col color d'uve mure;
Costa tèra l'ha un nòm!
Costa tèra
Che da sempe a sfama ij sò fij
Me mare vajanta
L'ha tempraje
A tuj j 'ancàpit dla vita;
Costa tèra l 'ha un nòm !
Costa tèra
Che 'd bin an dà
E già dane nen pòch,
L'é la còsa
Pì bela avù da Nosgnor;
Costa tèra l'ha un nòm!
Costa tèra
Ch'a spassia 'l mè euj
Dal pian a le prime
Colin-e e le pì àute montagne,
Andova ij
Milanta paisan,
Vignareul, montagnar. ..
Con sudor as guadagno el sò pan;
Costa tèra l 'ha un nòm
Un sol nòm ... PIEMONT!!!
(Dzèmber 1987)