Rino Serra/Le fior dël mal/063

Da Wikisource.
Jump to navigation Jump to search

LXIII. Arnosa e girondolon-a[modifiché]

Dime, a vòlte a s'àussa Agata tò cheur,
Lontan dal nèir océan ëd la spòrca sità,
Anvers un àutr océan ëd lus e splendor,
Bleu ciàir e si përfond, coma la verginità?
Dime, a vòlte a s'àussa Agata tò cheur?

Ël mar, ël grand mar, a consola nòsti travaj!
Che demòni a l'ha dotà 'l mar, rauch cantor
Ch'a compagna l'in-mens òrgo dij vent magistraj,
Ëd costa soa funsion sublin dël cunador?
Ël mar, ël grand mar, a consola ij nòsti travaj!

Pòrt-me via, vagon! Rapisme o nav, còs'ampòrta!
Leugn! Leugn! Sì la pàuta l'é fàita 'd nòsti pior!
-L'é vera che 'l trist cheur d'Agata quajvòlta
A dis: leugn dai rimòrs, dai crimin e dai dolor,
Pòrt-me via, vagon! Rapisme o nav, còs'ampòrta?

Oh coma 't ses lontan paradis përfumà,
Dova sota 'n ciàir asur tut a l'é gòj e amor,
Dova tut lòn ch'a s'ama l'é degn d'esse amà,
Dova 'nt ël piasì pur së spërfonda 'l cheur!
Oh coma 't ses lontan, paradis përfumà!

Ma 'l verd paradis ëd j'amor ëd noi masnà,
Le corse le canson, ij basin e ij bochèt,
Ij violin vibrant da daré dle colin-e là,
Con ij bocaj ëd vin, le sèire, fra ij boschèt,
-Ma 'l verd paradis ëd j'amor ëd noi masnà,

L'inossent paradis, strapien ëd piasì furtiv,
A l'é già pì lontan ëd l'India e dla Cin-a?
Pudoma ciamelo con dij crij implorativ,
E animelo ancor ëd na vos argentin-a,
L'inossent paradis, strapien ëd piasì furtiv?