Rino Serra/Le fior dël mal/047
XLVII. Armonìe dla sèira[modifiché]
Varda-sì ch'a-i ven ël temp doa vibré as sent
Minca gamba 'd fior e vapora come incensor;
Viro 'nt l'aria dla sèira son e përfum ancor;
Valser malincònich e languid ëstordiment!
Minca gamba 'd fior a vapora come incensor;
Ël violin a tërmola coma 'n cheur perdent;
Valser malincònich e languid ëstordiment!
Ël cel l'é trist e bel com un trist autar àor.
Ël violin a tërmola coma 'n cheur perdent,
Un cheur tënner ch'a òdia 'l gnente, grand sombror!
Ël cel l'é trist e bel com un trist autar àor;
Ël sol l'é nijasse 'n sò sangh ch'as gruma al vent.
Un cheur tënner, ch'a òdia 'l gnente, grand sombror!
Dël passà luminos a cheuj minca orma present!
Ël sol l'é nijasse 'n sò sangh ch'as gruma al vent...
Ël tò arcòrd an mi a lus coma ostensor!