Renato Bertolotto/Lagh ëd Misurin-a

Da Wikisource.
Jump to navigation Jump to search

Artorn


Lagh ëd Misurin-a[modifiché]

TRAMONT[modifiché]

Ël lagh a deurm an mes a le pinere:
aute le dolomiti a l’orisont
së specio andrinta j’eve personere
ant l’ora silenziosa dël tramont.
Ma peui che ’l sol a cala, tòst as leva
na còtia e dossa ariëtta dësmorina
ch’a gieuga misteriosa dzora dl’eva
ch’a bogia frissonand a vantajina,
e i sercc slargandse van murì sle sponde.
Le ponte as vesto dle pi bele nuanse
e i pin ciusono come annamorà.
Da le trasse dj’hôtels anluminà
na musica da jazz cuna le danse.
Le barche a riva son cunà da j’onde.

LA CANTILENA DLA PINERA[modifiché]

Con mila e mila steile per corona,
a splend an mes al cel la luna piena.
Da la pinera ancreusa ch’a frissona
pian pian a s’ciòd na ciaira cantilena:
l’è un sofi ’d vent ch’a biauta a ch’a ciusona
da pin an pin parèj ’d na vos serena,
l’é musica legera ch’apassiona,
una canson ch’ancërma e ch’ancadena.
E la canson a cor da pin a pin,
a vòla e a së spatara per l’argent
dla luminosa neuit piena d’incant.
A va e ven, con andi carëssant
la canson bela sota ’l cel lusent,
vsina e lontana, an sij frisson dij pin.

Da Armanach piemontèis për ël 1935 (Arpijà an Come un vòl ëd rondolin-e Poesie e prose in lenga piemontèisa Ca dë Studi «Pinin Pacòt», Turin 1992 Nr 6/7 Colan-a «Ël mej dij mej».