Nino Costa/Mama!
Mama!
[modifiché]Su, contra 'l sol, frësca, robusta, viva,
boton fiorì da la mia carn passìa,
su, contra 'l sol, contra la gent cativa,
mia difèisa, me seugn, speransa mia.
Adess sì ch'am n'an fà che chiel më scriva;
adess sì ch'am n'an fà che 'l mond a rija:
dòp la tempesta i l'hai tocà la riva;
i son mama 'dcò mi... Che maravìa!
I t'àusso an sij mè brass... D'antorn a noi
la campagna a fioriss, l'avril a canta,
tute le rame dj'erbo a stërmo 'n ni.
E ti të slarghe j'euj, mè bel fërfoj,
ti 't ses l'avril, la primavera santa,
e gnente al mond a l'é pi bel che ti.
(an: Mamina, Edission Viglongo)