Nino Costa/La stòria dël torototela

Da Wikisource.
Jump to navigation Jump to search

Artorn


La stòria dël torototela[modifiché]

Prima stòria[modifiché]

A-i era 'n capon dla rassa padoan-a
ch'as lamentava 'd nen avèj la crësta
e 'n bel galèt ardì 'd rassa nostran-a
a-j dis che për quàich dì chiel a-j la presta.

Anlora 'l nòst capon vestì da festa
e con la crësta dël galèt an testa
as në va spassëgé për la campagna
superbi com a fùissa 'l re dë Spagna.

Ma quand ch'a l'ha vorsù fé 'n pòch l'amor
con na galin-a an serca dë sfojor
a l'ha capì – për divla com am ven –
che mach avèj la crësta… a basta nen.

Sconda stòria[modifiché]

A-i era 'n merlo gelos dla soa metà
che tut ël di stasìa sël “chi va là”
con lë spaghet adòss che 'n quàich amis
lo fèissa cavajer dë Stupinis.

Chiel a vaitava tuti ij moscardin
chiel a stopava tuti ij pertusin
e për avèj le pòrte pi sicure
a-j ficava 'l luchèt e 'd saradure.

Ma antant che 'l pòver merlo a s'anmatìa
la merla da sot gamba a-j la fasìa
përché 'l povròm, con tuta soa paura,
a-j lassava duverta na filura.