Doi tòch ëd bronz[modifiché]

Doi tòch ëd bronz l'avìa ant le man Nosgnor:
un a l'ha dàjlo a n'àngel, l'àutr al diav
disendje: "Fé con sòn vòst caplavor".

Son butàsse al travaj l'àngel e 'l diav
tuti doi volonté, për l'ambission
ëd fésse vëdde 'l travajeur pi brav.

L'andoman son rivà dnans ël padron,
con sò travaj finì - bròca për bròca -
fàit ognidun second soa cognission...

L'àngel dël cel a l'avìa fàit na ciòca
e 'l diav dl'infern l'avìa forgià 'n canon.