Nino Costa/Crija a j'amis për la sin-a a Val San Martin

Da Wikisource.
Jump to navigation Jump to search

Artorn


Crija a j'amis për la sin-a a Val San Martin[modifiché]

Vist che n’argioissansa an companìa,
ch’a buta an cheur ël bonimor pi s-cett,
l’é lòn ch’a ten giojos e an alegrìa
j’Amis ëd la Barbera e dël dialèt;

vist e provà ch’a-i é pa gnente ëd méj
che na sernìa ëd poeta e 'd prosador,
andoa ch’as treuvo ij giovo ansema ai vej,
mach che un bon òsto a fasa l’editor;

vist che 'd sigur l’eterna Providensa,
ch’a fila le marele dël destin,
deuv avèj fàit, pensand a st’eveniensa,
la Val e la Biondin-a ëd San Martin;

vist e considërà che, se ant la vita
pen-e e sagrin a ten-o 'n pòch tròp pòst,
për gròss ch’a sìo, i’é pa dolor, na sfita
ch’a scapo nen dnans ël përfum dn’aròst;

vist che ant ël mond a val d'pi na paciada,
che ij cont-corent e ij crussi dij banché;
vist ch’a val d'pi na bota a l’argalada
che sent-sinquanta rogne da graté;

vist e notà ch’a-i é pi 'd na biondin-a
ant la bela ostatiòta ëd Murisengh,
doa a v’arlegra 'n bon odor ëd cusin-a
e a v’argala 'l gariòt un vin fiamengh;

vist tut sossì, lolì, lolà, lolen-a,
l’oma decis ëd déje n’arcaplà,
d'trovésse, pien 'd gigèt e sensa gen-a,
tacà na tàula pronta e preparà;

tacà na bela tàula piemontèisa
carià 'd galuparìe sël bianch dël lin,
doa le bote 'd barbera e cole 'd frèisa
canto la glòria dël Monfrà e 'd Turin;

tacà na bela taula a la paisan-a,
andoa ch’a-i sia da bèive e da mangé,
përchè a mangia fòrt la gent onesta e san-a,
e a bèiv robust për peui podèj canté!

Gnun piemontèis ch’as vanta e ch’as rispeta
l’avrà 'l fìdich ëd nen vorèj ëvnì;
i’é gnun-e scuse: gàstrica e boleta
savoma gnanca lòn ch’a veulo dì.

Basta ch’a-i sia na cita smens d'folìa
cascà drinta a un sorghet ëd nòst servel,
përchè ch’a s-ciòda an cheur la poesìa,
përchè sùbit ël mond në smija bel.

Pr'esse poeta a fa pa bzògn dë scrive,
e për canté fa pa dabzògn ëd sust…
Për quatr dì al mond ch’i l’abio ancor da vive,
val d'pi 'n piasì che sent e quatr dësgust!

E adess scoté el Menù, ch’a l’é dritura
la quintessensa d’un disné da spos:
Antipast assortì, Mnestra 'd verdura,
Vitel tonà, Fruta, Formagg e Doss.

(Ël doss, iv lo diroma ant un’orija,
l’é na fiamenga e gran specialità,
ch’a sarà per j’Amis na maravija,
mach che l’amer l’abio lassàlo a ca).

Cafè… e vin për completé la festa
e bote e bote tra ij bicer e 'j piat;
na mesa bota dël botal a testa,
na bota stopa ëd col ch’a flamba, an quatr!

E tut sossì mach per vint lire pen-a,
sensa conté 'l bon sangh e 'l bonimor,
sensa conté, car Amison, na pien-a
d'cole robuste e tòghe da brindor.

L’adressa mancomal l’é sempr istessa:
nùmer 204, Val San Martin.
(i’é 'l 3 për coj ch’a veulo fé pi an pressa,
e 'l Pò për coj ch’a deuvo fé ij gatin).

Tranta Stèmber, Màrtes d'sèira, eut ore
e mesa giuste, doa ch’a ferma 'l 3.
(Për esse pontoaj l’han pa bzògn ëd cure:
j’Amis a l’han la gran virtù dij re).

S’i-j ten-e a esse dij nòsti, déve ardriss,
rësponde prest ch’i j'abio 'd temp an mes,
mandé sòld e adesion a st’indiriss:
… Pinin Pacot, via Stampatori 6.

Ël Segretari