Cél piemontèis

Nòst cel l'é ancora nen col cel famos
ch'a fa l'arciam d'Italia ai forësté.
L'é un cel da montagnard e da bërgé:
nìvol soens e mincatant nebios.

Però quand ch'a së specia an sij giassé
quand ch'a së slarga pasi e luminos
e quand ch'a rij, giojos come në spos,
sij camp e vigne, che bel cel ch'a l'é!

E peui l'é nòst, l'é 'l cel dël nòst pais
l'é andoa ch'a ponto ij vej lë sguard profond
e le maraje a s-ciàiro 'l Paradis...

E 'l piemontèis, possà da sò travaj,
l'ha bel giré la tèra e vëdde ëd mond,
ma ël cel, sò cel, a lo dësmentia mai.