Nino Costa/Baraba

Baraba

A seurto da 'nt la betola - 'l padron
ant l'esercissi ai lassa pa rusé -
e a séguito a tachesse e a crijassé
sota la luce spalìa dij lampion.

"Daije... forlo... ciapelo... lass-lo andé...
T'has-to 'l lìngher? Dio f...s, ciapje 'l baston".
Na lama... 'n crij... na bestëmia... 'n posson,
e n'òm a l'é cascà 'n sël marciapé...

Tuti j'àutri ant un gnente a son scapà...
J'é nen na guardia... Për la neuit seren-a
as sent la vos dël moribond ch'a sclama.

...Ant la sofìa - lassù - na pòvra mama,
con la lucerna anvisca e 'l cheur an pen-a,
a speta 'l fieul ch'a l'è 'ncor nen tornà.