Ave Marìa

Ave Maria… da le ciaborne veje
ch’ a saro le Ca neire e ‘l Borgh d’ jë strass,
dai bei palass ch’ a guardo anvers le leje,
'n Valdoch, dal Seralio e dai Molass;
dal Borgh ëd Po fin-a a le Basse ‘d Dòra,
da la Crosëtta al parch del Valentin,
è tut Turin ch’ at prega e ch’ at’ adòra
j’è tut Turin ch’ at conta ‘j sò sagrin…
O Protetris dla nòstra antica rassa
cudisme Ti, fin che la mòrt an pija:
come l’acqua d’un fium la vita a passa,
ma ti, Madonna, it reste… Ave Maria.