Milo Bré/Vnì che i crijoma ant la lenga dij Vej
Ël crij cru e magonà ‘d Camillo Brero për la lenga sanglanta dij vej dël Vej Piemont. Veuja d’arvangia, ëd libertà, ëd giustissia e ‘d fradlansa, rudia e determinà: n’anvit a pensé da òm lìber.
Vnì che i crijoma ant la lenga dij Vej…[modifiché]
Vnì che i crijoma ant la lenga dij Vej ël magon ch’an tormenta!
Vnì! për ch’an sento lassù e lontan coma a brusa nòstr cheur…
l’é nòstra tèra ch’an brusa e ch’an parla da ‘n fond a nòstr sangh:
sangh ch’a n’arbeuj ant le ven-e così coma arbeuj ant la poer
col ëschincià da la gola e dal cheur dij nòstr Vej ësgosà…
Vnì che i crijoma ant la lenga che ij Vej l’han batià con soa mòrt!
Vnì! për ch’as sapia che nòstr giurament l’é l’arson dël silensi:
col ch’a disìa chë ‘d si përchè ij cit, ëdcò lor, dovìo vive,
col che a disìa chë ‘d nò ant le bataje, trincere ‘d soa ca…
col che da sempre a cimiss ant la carn e ant la gola dij pòver…
Vnì che i crijoma l’anvìa d’arvangia dla Gent Piemontèisa…
– Noi soma noi! Piemontèis e peui pro! sensa gnun-a etichëtta!… –
Minca stagion fin-a a jer ij potent l’han cambiane ij confin…
– Noi soma noi! Piemontèis e peui pro! Avzinaj dl’Univers…
Noi, Frej dël mond, noi androma sëmnand, minca di, smens ëd pas!… –
Vnì che i crijoma la sèj ‘d libertà che ant nòstr sangh a magon-a!
Vnì! për dësblé le legende dla luva e ij croass imperiaj:
coj ch’ l’han rendù nòstri Vej ij sò s-ciav, nòstra tèra provincia!…
Vnì! për trascrive la stòria da bass tra le tombe dij Vej…
Lor, nòstri Vej, son la Lege e ‘l Podèj, vos ëd patria viva!…
Ij Brandé – Armanach ëd Poesìa piemontèisa, 1979