Milo Bré/L'é primavera epura

Da Wikisource.
Jump to navigation Jump to search

Artorn


L'é primavera epura...[modifiché]

L'é primavera! ...e pura la giornà
va dëscariandse ’l sol daré dij mont
dësbland soa lus ant l’òr doblé amplacà
su un cel giassà che ’nt ël mè sangh a fond.
Vòlo an ariond ij pivi ansima ai cop
con ant ël bech ij bòt ëd l’Avemarìa.
Canson! Arcòrd che am saro andrinta ungrop
dë stra che jer rivavo e adess van via.

Ël campagnin a lassa ij camp e a canta.
A canta l’arsigneul an sla rivera
e ’l vent drinta le bronde... ma an mi a stanta
mia vos anvërtojà ant l’ora ch’a l’era:
l’ora ch’a l’era e a l’é pì nen con mi
che am ciosionava an brova a tuti ij di
sla boca dij mè fieuj ël sò «Bondì!».
«Bondì» che a l’era e ch’a sarà mai pì.