Milo Bré/Ij passaròt
< Milo Bré
Ij passaròt[modifiché]
Soj, për ël cel, ij pòvri passaròt
a giro trist e meusi an mes dla nebia...
soj, lor a van sercand chissà che còsa
dzora dla tèra bianca ch’a s’arpòsa.
Òh care, pòvre bestie sagrinà,
sperdùe ant l’abandon ëd la natura,
ch’i andé sercand trames dla fiòca pura
ancora un segn ’d na giòia ormai passà,
seufre tranquile e an pas la vita dura,
che lë splendor dla prima a tornerà...
Soj, për ël cel ij passaròt a van
voland darera a un seugn ancor lontan.
da «Ij Brandé» n°63 dij 15 d’avril 1948