Luis Olivé/Sol d’invern

Da Wikisource.

Artorn a la Tàula


Sol d’invern[modifiché]

Dick, bel can luv dal peil giaun bigerà,
cor via lontan për la campagna speuja,
spariss dré dle caussagne e ant ël sëmnà
së slanssa a boconé l’ariss porcheuja:

Caì!… caì!…, le lesne a schersso pa,
sta geneuria d’invern, col l’è na pleuja!
La campagna as dëstend coma na feuja
e ‘l sol aj pieuv na lus còtia, andorà:

Cel d’un biadèt leger, nuvole bianche;
erbo ch’a stendo i branch maire e patì
a ciamé la stagion bela di nì…

E tra coi branch: tnisend le man an s’j’anche,
coma na cassinera ant so polé,
la Vila –Vilastlon – ‘s china a vardé.