Luis Olivé/Prim frissonn

Artorn a la Tàula

---

Prim frisson

ANDOA ch’it sesto mai, Catarinin,
che ‘t l’has dësviame ‘l prim frisson ëd veuja
ch’a preuva un gich novel, tra feuja e feuja,
quand ch’a s-ciòd a la luz ëd la matin?

Andoa ch’it sesto mai, Catarinin?
Sèt ani: Doi pipì fòra dla greuja…
Na pieuva ‘d reuse e d’òr cala mineuja
sul bòsch dij mè ricòrd. Sùbia un cardlin.

Scotlo, s’it vive ancor, Catarinin.
J’ero përdusse, an mez a j’èrbo, a cheuje
‘d mofe për fé ‘l presepio: e ‘l cavagnin

lo rezijo ancroziand nòstri dilin…
Na tampa. Un tonf… Doi cheur ant un nì ‘d feuje.
Na stèila e un mè frisson tra ij tò brassin.

1947

---