Luis Olivé/Madrigal dle fije ‘d mè paìs
Madrigal dle fije ‘d mè paìs
[modifiché]Le fije ‘d mè paìs son tute bele.
A rijo come j’onde tra doe rive.
L’han i cavèj ch’a odoro ‘d ramulive.
Sò sangh a l’è un vin d’uve moscatele.
Le fije ‘d mè paìs son tute bele.
Magara ij sò dilin san gnanca a scrive
ma, s’at carësso an front, at fan arvive.
E j’euj? Bleu ‘d j’Alp, ël bleu dle gensianele.
Le fije ‘d mè paìs son tute bele.
L’han nen studià la musica e ‘l latin:
ma ai camp a canto e an cesa a diso ‘l bin.
Mi l’hai mai vist al mond ëd fìe pi bele.
Spose d’Alpin, d’alpin a saran mame.
Se ‘l sol a splend, son lor ch’ai dàn le fiame.