La Bibia piemontèisa/Testament Vej/Surtia/Surtia 40

←Surtia 39

La Bibia piemontèisa Surtìa (Èsod)

Levìtich 1→

Surtìa

40

La Bìbia piemontèisa - Surtìa 40

Consacrassion ëd ël Santuari e dij Sacerdòt

¹Nosgnor a l’ha parlà a Mosè e a l’ha dije: ²“Ël prim dì dël prim mèis buta an pé ‘l Tabërnàcol, visadì, la Tenda dël Rëscontr. ³Bùtje al fond l’Èrca dl’Aleansa e dë 'dnans dl’Èrca dëstendje ‘l Vel. ⁴Apress, pòrtje drinta la tàula dij pan dl’oferta con ij sò asi dëdzora. Pòrtje 'ndrinta ‘dcò 'l Grand Candlé e visca soe lampie. ⁵L’autar d’òr për l’ancens butlo dë 'dnans ëd l’Èrca ch’a conten lë Strument ëd l’Aleansa e buta a sò pòst ël vel d'intrada dël Tabërnàcol, . ⁶L’autar dj’olocàust bùtlo dë 'dnans a l’intrada dël Tabërnàcol, visadì dë 'dnans a la Tenda dël Rëscòntr. ⁷Sistema ‘l lavàbos an tra la Tenda dël Rëscòntr e l’autar, e ampinìsslo d’eva. ⁸Apress, buta an pé la cort tut dantorn ëd la tenda, e pend ël vel dl’intrada dla cort.

⁹Peui pija l’euli dl’onsion santa e onzne ‘l Tabërnàcol e tut lòn ch'a conten. Consacrlo con tùjt ij sò asi, parèj che tut a në resta consacrà. ¹⁰Ónz ëdcò l’autar dj’olocàust con tùit ij sò asi; consacra l’autar, che parèj a sarà pì che sant. ¹¹Ónz ëdcò ‘l lavàbos con ij sò sòco e consacrlo.

¹²Apress, comanda che Aron e ij sò fieuj as avzin-o a l’intrada dla Tenda dël Rëscontr e as purifico con d’eva. ¹³Peui fà la vestission d’Aron butàndje adòss soe vestimente sacrà e onzlo, e parèj a sarà consacrà përchè a sìa mè sacerdòt. ¹⁴Órdina peui ch’as presento ij sò fieuj e véstje dle tùniche. ¹⁵Ónzje com it l’has fàit con sò pare ‘d lor përchè a sio ij mè sacerdòt. Cost' onsion a-j destinerà d’esse an përpetuo dij sacerdòt për tute soe generassion”.

Mosè a compiss j’órdin ëd Nosgnor

¹⁶Mosè a l'ha compì precis tut lòn che Nosgnor a l’avìa comandaje. ¹⁷Ël prim dì dël prim mèis ëd lë scond ann a l’é stàit butà an pé 'l Tabërnàcol. ¹⁸Mosè a l’ha butalo an pé an piassand ij sòcoj, ij pianton, le travërse e le colòn-e. ¹⁹Peui a l’ha fàit dëstende la covertura dëdzora dël Tabërnàcol, e a l’ha fala quaté con le pej, precis coma Nosgnor a l’avìa comandaje. ²⁰Peui a l’ha pijà lë Strument ëd l’Aleansa e a l’ha butalo drinta dl’Èrca, a l’ha sistemà le stanghe dl’Èrca e dzora a l’ha butaje ‘l Coèrcc ëd ël Përdon; ²¹a l’ha fàit porté l’Èrca ant ël Tabërnàcol, a l’ha fàit pende ‘l Vel e parèj l’Èrca dl’Aleansa a l’é stàita stërmà darera dël Vel, precis coma Nosgnor a l’avìa comandaje. ²²Peui a l’ha fàit sistemé la tàula dij pan dl’oferta ant la Tenda dël Rëscòntr, dë 'dnans ëd ël Vel, an sël fianch nòrd, ²³e a l’ha presentà ij pan a Nosgnor, coma ch’a l’avìa comandaje. ²⁴A l’ha fàit sistemé apress dël Grand Candlé drinta dla Tenda dël Rëscontr, an sël fianch meridional ëd ël Tabërnàcol, da la banda opòsta dla tàula, ²⁵e a l'ha viscà le lampie dë 'dnans a Nosgnor com a l’avìa comandaje. ²⁶A l’ha fàit sistemé l’autar d’òr ant la Tenda dël Rëscontr, dë 'dnans al Vel dë drinta, ²⁷e a l’ha brusaje l’ancens aromàtich, precis coma Nosgnor a l’avìa comandaje. ²⁸Apress, a l’ha fàit pende ‘l Vel dl’intrada dël Tabërnàcol, . ²⁹A l’ha fàit coloché l’autar dj’olocàust dë 'dnans a l’intrada dël Tabërnàcol, visadì dë 'dnans a la Tenda dël Rëscontr, e 'mbelelà a l’ha smonuje l’olocàust con l’oferta ch’a lo compagnava, precis coma Nosgnor a l’avia comandaje. ³⁰Ël lavàbos a l’ha falo coloché an tra la Tenda dël Rëscontr e l’autar e a l’ha ampinilo d’eva për le purificassion, ³¹dagià che Aron e ij sò fieuj a l’avìo da netiesse le man e ij pé ³²cora ch’intravo ant la Tenda dël Rëscontr e quand ch’as avzinavo a l’autar, precis coma che Nosgnor a l’avìa comandà a Mosè. ³³A la fin a l’ha fàit pende le tende ch’a formavo la cort dantorn al Tabernacol e l’autar e 'l Vel a l’intrada dla cort. A l’é parèj che Mosè a l’ha compì tuta l’euvra.

La presensa gloriosa ‘d Nosgnor a ampiniss ël Tabërnàcol,

³⁴A l’é 'ntlora che la nìvola a l’ha quatà la Tenda dël Rëscontr e la presensa gloriosa ‘d Nosgnor a l’ha ampinì tut ël Tabërnàcol^[1]. ³⁵Mosè a l’ha podù pì nen intré ant la Tenda, përchè ch’a l’era calaje la nìvola e la presensa gloriosa ‘d Nosgnor a l’avìa ampinì tut ël Tabërnàcol, .

³⁶Ore, tute vire che la nìvola a partia dal Tabërnàcol, ël pòpol a l’avrìa ancaminasse a 'ndeje dapress. ³⁷Se la nìvola, contut, as levava nen da lì, lor a restavo anté ch’a j’ero fin a tant che la nìvola as në partiva. ³⁸Për tut sò sogiorn ant ël desert, tut ël pòpol a vëddìa, durant ël dì, la nìvola ‘d Nosgnor ch’a stasìa dzora dël Tabërnàcol, e, dla neuit, a vëddìa ‘n feu.

Nòta

1. Cfr. 1 Rè 8:10-11; Isaìa 6:4; Ezekiel 43:4-5; Arvelassion 15:8.