La Bibia piemontèisa/Testament Vej/Salm/Salm 64
Ij Salm[modifiché]
64. Nosgnor! Scota mia vos mentre ch’i levo mia plenta[modifiché]
- Ël Salmista a ciama a Nosgnor ch’a lo guerna dai sò nemis bin pericolos e peui a fortiss con fiusa che Dé a-j butrà an derota e a mostrerà soa giustissia dëdnans a tuti coj ch’a stan a vardé lòn ch’a càpita.
1Pr’ ël diretor dël còro: un Salm ëd David. Nosgnor! Scota mia vos mentre ch’i levo mia plenta: vàrd-me dai nemis ch’am mnasso. 2Fà che ij complòt che 'd gent grama a ordiss a l'àbio gnun efèt[1], salv-me da costa furfa ‘d malfasent. 3A mòlo la lenga tanme dë spa e a tiro ‘d paròle velenose tanme ‘d flece. 4A së stërmo për tireje contra ai nossent; as fan gnun ëscrupoj a tacheje a l’amprovista e a l’han pa tëmma d’arvangia. 5As cisso j’un j’àutri a fé ‘l mal e a studio da stërmà coma piassé ‘d tràpole. A penso: “Gnun as n’ancorz-rà”. 6Mentre ch’a màchino ij sò crimen, a diso: “I l’oma tut previst e calcolà!”.
Che ‘d malissia ch’a-i é ant ël cheur uman! 7Tutun, a sarà Nosgnor ch’a-j franderà contra soe flece e a l’amprovista a-j fraperà. 8A l’é stàita soa lenga ‘d lor a feje tombé, e tuti coj ch’a-j varderan as në faran ësbefie ‘d lor. 9A sarà ‘ntlora che tuti a l’avran tëmma ‘d Nosgnor e a proclameran soe euvre. Dë 'dnans a lòn che Nosgnor a fà a resteran a boca doverta. 10Ël giust a selebrerà ‘l Signor e a troverà soa sosta an chiel. Coj ch’a fan lòn ch’a l’é drit as në glorieran.
Nòte[modifiché]
- ↑ O "Scond-me da...".