La Bibia piemontèisa/Testament Vej/Salm/Salm 58
Ij Salm[modifiché]
58. Vojàutri ij governant, conossev-ne lòn ch’a veul dì giustissia?[modifiché]
- Ël Salmista a sùplica Nosgnor ch’a castìga ij giudes corompù përchè na ciàira dimostrassion dël giudissi divin a persuada la gent che Nosgnor a l’é ‘l Giudes giust ch’a rend giustissia ai giust.
1Për ël diretor dël còro. Un Salm ëd David da cantesse scond ël ton ëd “Dësbla pa”. Vojàutri ij governant, conossev-ne lòn ch’a veul dì giustissia? Vojàutri ij giudes, giudichev-ne con dritura? 2Nò! An vòst cheur i studie mach la manera ‘d përvertì la giustissia; i spàntie la violensa për tut ël pais.
3Gent ëd cola sòrt-lì a nass già përversa[1], fin-a da cit a san bin coma dì ‘d busìe; a fan mach lòn ch’a-j passa për la testa. 4A spuvo ‘d tòssi tanme ‘d serp anvelenà; a son tanme d’aspo ch’a dan da ment a gnun. 5Le mùsiche dj’anciarmeur a-j farìo gnun efet, a l’é l’istess vàire ch’a sio brav a soné.
6Nosgnor! S-ciapa ij sò dent anvelenà, fracassa le ganasse dë sti leon. 7Ch’a dësparisso tanme d’eva sbrincià an s’un terèn sèch; fà che soe arme a-j sio dësùtile an soe man. 8Ch’a sio tanme ‘d lumasson ch’a-j në resta mach la bava, tanme na masnà abortìa ch’a riva pa a vëdde ‘l sol. 9Nosgnor a-j ramassrà via, sia vej che giovo, ëd na manera pì lesta che na pignata a beuj dzora ‘d fassin-e afoà.
10Ël giust a farà gran’ festa che giustissia a l’é fàita, as laverà ij pé ant ël sangh dij përvers. 11Peui, a la fin, tuti a diran: “Përdabon a-j é n’arcompensa për coj ch’a vivo për Nosgnor; bin sicur a-i é sì an sla tèra ‘n Dé ch’a giùdica con giustissia.
Nòte[modifiché]
- ↑ Minca na creatura uman-a fin-a da cita a porta an chila la smens ëd la corussion dël pecà. A peul dësvlopesse mal s'a lé nen dissiplinà da n'educassion conform ai valor ëd la lege 'd Nosgnor.