La Bibia piemontèisa/Testament Vej/Salm/Salm 21
Ij Salm[modifiché]
21. Ël rè as arlegra dla fòrsa che ti ‘t jë daghe[modifiché]
- El Salmista a làuda Nosgnor për la manera che chiel a goerna e a benediss ël rè davìdich.
1Për ël diretor dël còro. Un salm ëd David. Nosgnor! Ël rè as arlegra dla fòrsa che ti ‘t jë daghe; com as sent content ëd le vitòrie[1] ch’it jë acòrde! 2Ti ‘t j’acòrde lòn che sò cheur a n’ha anvìa; it j’arfude pa soe arceste (anterludi).
3Ti ‘t jë pòrte 'd benedission bondose; ti ‘t jë bute na coron-a d’òr an sla testa; 4A l’ha ciamate ‘d sostnì soa vita e ti ‘t l’has acordaje na vita longa e na dinastìa ch’a vnirà mai a manch[2]. 5It l’has faje selebré toa vitòria, it l’has quatalo d’onor e dë splendrior majestos. 6Përchè ti ‘t l’has acordaje ‘d benedission eterne; an arseivend-lo a toa presensa it jë daghe na gòj granda. 7Përchè ‘l rè as confida an Nosgnor, e për motiv ëd la fidelità dl’Altissim, sò tròno a sarà mai socrolà[3].
8Toa man a prevalrà sù tùit ij tò nemis; tò podèj a l’é tròp fòrt për coj ch’at t’han an òdio. 9It jë faras brusé tanme ‘n feugh anvisch, ël dì che ti 't-j manifesteras. Toa 'ndignassion[4] a-j consumerà; ël feugh a-j dvorerà. 10Ti dëscanceleras ël nòm ëd soa fijolansa ëd lor da la tèra, ij sò dissendent da ‘n tra la rassa uman-a. 11Vera, a pensavo ‘d fete dël mal, a l’avìo studià la manera ëd fete ‘d dann, ma a son pa riussì a felo. 12Cand ch’a pijo la mira për frapete con soe flece, ti ‘t -j fase bate l’artreta.
13Nosgnor! Àuss-te trionfant an tut tò podèj! Con la mùsica e ‘l cant i selebreroma toe 'mprèise[5]!