La Bibia piemontèisa
Ij Salm

Salm

149. Canté a Nosgnor na càntica neuva!

Ël Salmista a ciama 'l pòpol a laudé Nosgnor, përchè chiel a l'é giust e a-j dà l'arvangia an sij nemis.

¹Laudé Nosgnor! Canté a Nosgnor na càntica neuva! Laudelo 'nt la radunansa dij sò divòt! ²Che Israel a s'arlegra an sò Creator! Che 'l pòpol ëd Sion a argiojissa an sò Rè! ³Ch'a làudo Sò nòm con la dansa! Ch'a canto 'd làude a Chiel con l'acompagnament dij tambornin e dl'arpa! ⁴Përchè Nosgnor a l'ha gòj 'd Sò pòpol. Chiel a esalta con la liberassion coj ch'a son crasà. ⁵Che ij sò divòt as arlegro përchè Nosgnor a l'ha daje l'arvangia^[1]! Ch'a crijo 'd gòj ant ij sò let. ⁶Ch'a làudo Nosgnor quand ch'a ten-o an man na spa a doi trance; ⁷për vendichesse dle nassion e për castijé ij forësté. ⁸A gropo ij sò rè con ëd caden-e e ij sò nòbij con ëd such ëd fer. ⁹A dan esecussion al giudissi che ij sò nemis a në son ëstàit condanà. Tùit ij Sò fidej a saran vendicà. Laudé Nosgnor!

Nòte

↑ O "për sò onor".

[1] O "për sò onor".

[1]