Introdussion

Costa euvra a conta le vicende 'd Rut, na fomna moabita marià a n'Israelita. Costì a meuir e Rut a dësvela na fidelità strasordinaria anvers ëd soa madòna e n'afession ancreusa al Dé d'Israel. A la fin Rut a treuva 'n marì neuv an tra ij parent dël prim marì. Da cost mariagi a nass-rà 'n fieul ch'a sarà 'l grand ëd David, ël rè pì vajant d'Israel. A l'é për lòn che Rut a treuva pòst an tra j'antich ëd Gesù midem (cfr. Maté 1:5).

La stòria seren-a 'd Ruth a l'é colocà ant ij temp ëd violense dëscrivù ant ël liber dij Giùdes, ma, second vàire savant, a l'é stàita scrita pì tard, ant un perìod ch'a l'é malfé da precisé. Mentre che le vicende contà ant ël lìber dij Giùdes a mostro le dësgrassie d'un pòpol ch'a së slontan-a da Dé, ël liber ëd Rut a mostra la benedission dàita a na strangera ch'as convert al Dé d'Israel e ch'a intra a fé part ëd sò pòpol.