La Bibia piemontèisa/Testament Vej/Proverbi/Proverbi 8

←Proverbi 7

La Bibia piemontèisa Provèrbi

Proverbi 9→

Provèrbi

La Bìbia piemontèisa - Proverbi 08

8

L'apel ëd la saviëssa

¹L'eve pa sentù la ciamada ch'a fà la saviëssa e l'anteligensa ch'a fà 'rsoné daspërtut soa vos? ²Vardela là an sij pòst elevà dacant ëd le strà; a l'é piassasse pròpi a la crosiera dle contrà. ³Vardela 'mbelelà a le pòrte dla sità e a l'intrada dij quarté^[1], là ch'a dis a àuta vos: ⁴"I faso n'apel a tuti vojàutri, mia vos as adressa a tuta la gent, gnun-e ecession. ⁵Vojàutri bonomeri, steme a sente! Abie 'd bon sens^[2]!! E vojàutri ij folaton, amprende l'anteligensa^[3].

⁶Scoteme: lòn ch'i l'hai da dì a l'é dl'amportansa la pì granda; tut lòn ch'i diso a l'é giust^[4], ⁷përch' i diso mach la vrità e am vniria gnanca 'n ment d'ambrojeve. ⁸Tute le paròle 'd mia boca a son drite^[5]; a-i é nen dë stòrt o 'd fàuss. ⁹Për coj ch'a l'han ëd cognission^[6] a son ëd paròle ciàire, e sclinte për coj ch'a veulo trové la conossensa. ¹⁰Avèj pì car mie istrussion pitòst che l'argent, e la saviëssa pitòst che l'òr zëcchin, ¹¹përchè la saviëssa a l'é pì pressiosa ch' ij rubin. A-i é gnente ch'iv peussa mai avejne l'anvìa ch'a-j sia paragonàbil. ¹²"Mi, la saviëssa, i stago 'nsema al Bon Sens e i sai 'ndova ch'a stan ëd cà la Conossensa e 'l Disserniment. ¹³Tuti coj ch'a l'han timor^[7] ëd Dé a l'han an òdio 'l mal. A l'é për lòn ch' i l'hai an ghignon la superbia^[8] e l'arogansa, la corussion e la gramissia^[9].

¹⁴Bon sens e bon giudissi a son mie qualità, tanme a lo son la rason e la fòrsa.  ¹⁵A l'é për mè mojen ch'ij rè a regno e che ij legislator a stabilisso lòn ch'a l'é giust. ¹⁶A l'é për mè mojen ch'ij governant a governo e il magistrat a giùdico con giustissia. ¹⁷Mi i veuj bin a tuti coj ch'am veulo bin, e coj ch'am sërco am trovran. ¹⁸Mi i l'hai 'd richësse e d'onor, ansema a prosperità e giustissia. ¹⁹Ij mè frut^[10] a son mej che l'òr, fin-a mej che l'òr zëcchin. Mia produssion^[11] a val da pì che l'argent soasì. ²⁰I marcio an sël senté dla dritura, an sla via dla giustissia. ²¹Coj ch'am veulo bin a 'rseivran n'ardità bondosa, i ampinirai soe cassafòrt.

²²Nosgnor a l'ha dame fórma^[12] fin-a dal prinsipi, prima 'ncora ch'a s'ancaminèissa a creé^[13]. ²³A l'ha 'nstalame^[14] da l'eternità, dal comensament, prima ch' ël mond a esistèissa. ²⁴I son nassùa prima ch'a-i fusso le përfondità dj'océan, prim' anco' che le sorgìss a gargojèisso d'eva. ²⁵I son nassùa prima che le montagne e le colin-e a seurtisso fòra, ²⁶prima che Nosgnor a l'avèissa fàit ël mond e ij camp, o ch'a fussa seurtì fòra la prima póer midèma dla tèra. ²⁷Cand che Dé a l'ha stabilì ij cej, prima che chiel a trassèissa l'archengh ëd dj'océan, i j'era già là. ²⁸Già i esistìa prima che le nivole a fusso butà là 'n àut, anans ch' a fusso scavà bin ancreuse le surgiss. ²⁹I j'era già là prima ch' a fussa butà 'n lìmit ai mar përch' a 'ndèisso nen pì 'd dlà dij sò finagi. Cand che Nosgnor a l'ha trassà le fondassion ëd la tèra ³⁰mi i j'era l'architet ch'a-j'ëstasìa a le còste. Mi i l'hai sèmper compiasuje e i l'hai mai chità d'arlegreme 'd soa presensa. ³¹I j'era pròpi contenta cand ch' ël mond a l'é stàit creà e i son arlegrame tant ëd l'umanità^[15]. 

³²Anlora, mè fieuj, steme bin a sente: che 'd boneur ch'a l'han coj ch' a përcoro ij mé senté! ³³Scoté bin lòn ch'iv mostro, fé pa visa 'd nen! ³⁴Che 'd boneur ch'a l'han coj ch'a më scoto, coj che, di apress di, a vijo a mie pòrte, ch'a më speto, dacant a mia ca, ch'i në seurta! ³⁵A l'han ëd boneur përchè coj ch'am ancontro a treuvo la vita e 'l favor ëd Nosgnor. ³⁶Contut, coj ch' al contrari a veulo pa ancontreme, a fan mach ëd mal a lor midem. Tuti coj ch'am veulo pa bin a-j pias la mòrt.

Nòte

1. 8:1-3 cfr. Provèrbi 1:20-21.
2. O "buteve giudissi".
3. O "dovré 'n pò la testa".
4. O "I l'hai 'n ghignon minca tromparìa", "la tromparìa am dà fastùdi".
5. O "giuste".
6. O "disserniment".
7. O "timor reverensial".
8. O "l'orgheuj".
9. O "ch'a parlo an manera përversa".
10. O "cadò, argal".
11. O "mia archeujta".
12. O "creame".
13. O "prima ch'a creèissa minca d'àutra còsa". A l'é 'l "progèt" dla creassion midèma, ël sò criteri. Cfr. Arvelassion 3:14.
14. O "consacrame", "nominame.
15. O "con ij fieuj ëd l'òm".