Provèrbi[modifiché]

21[modifiché]

¹Ël cheur dël rè a l'è parèj ëd na bialera^[1] ant le man ëd Nosgnor: a la fà andé andova ch’a veul chiel.

²Tute le stra ch’a pija l’òm, ai sò euj a jë smijo bon-e, ma a l’é Nosgnor ch’a-j varda da bin e a në fà la valutassion^[2].

³A Nosgnor l’onestà e la giustissia a-j piaso motobin da pì che ij sacrifissi.

⁴Euj pien ëd blaga e ‘n cheur superb - lòn che tanti a-j pias ëd coltivé - a l’é pecà.

⁵L’òm ëd sust, ij sò proget a-j pensa da bin e lor a van a bon fin, ma chi ch’a fà le còse an pressa as artreuva a la fin an miseria.

⁶Col che a ambaron-a 'd tesòr a fòrsa 'd busiardarìe, as blaga mach për pòch, përchè a sërca la mòrt.

⁷La violensa dij pervers a sversa lor midem, përchè as arfudo 'd pratiché la giustissia.

⁸La condòta dl’òm gram a l'é tuta dë sghignarda, ma cola dl’òm net a l’é onesta.

⁹A l’é mej stess-ne daspërnojàutri ant un canton ëd na sofiëtta che avèj da spartì na cà antrega con na fomna ch’a l’é na litigàire.

¹⁰A coj ch’a l’han gnun-a religion a-j pias ëd fé ‘l mal: a l’han gnun-a pietà për sò prossim.

¹¹Cora che lë sbefios a ven castijà, ël bonomeri a dventa savi e cand che 'l savi a ven istruì, sò savèj a chërs.

¹²Ël Giust, Nosgnor, a sà bin lòn ch’a fan antëcà coj ch’a l’han gnun-a religion e a-j farà tombé an ruin-a.

¹³Col ch’a sara j'orije al braj dël pòver, cora che a brajerà chiel midem, gnun a-j rëspondrà.

¹⁴Un cadò fàit dë stërmà a pasia la flin-a e un cadò sotman a amboniss la furia pì violenta.

¹⁵A l'é na gòj për l'òm giust ch'a sia fàita giustissia, ma lolì a l'é në sparm për le canaje.

¹⁶L'òm che a së slontan-a da la stra dla saviëssa a tomberà an companìa dij mòrt^[3].

¹⁷Col che a-j pias fess-la bin a vnirà pòver e a sarà mai ësgnor col ch'a-j pias ël vin e gòde.

¹⁸L'òm gram a serv për gagi al giust e 'l malegn për la gent onesta.

¹⁹A l'é mej stess-ne ant un desert daspërnojàutri pitòst che ansema a na fomna tacabeghe e sèmper anrabià.

²⁰Ant la ca dl'òm giust a-i é 'd tesòr pressios e 'd përfum, ma 'l fòl a sghèira tut.

²¹Col che a cudiss la giustissia e la misericòrdia a trovrà soa vita, la giustissia e la glòria.

²²Ël savi a taca na sità 'd batajeur e a fà droché le fortificassion ch'a dan a lor tanta fiusa.

²³Col ch’a guerna la boca e la lenga as ten leugn dai sagrin.

²⁴Chi a l'é borios e sfacià e ch’a l’é conossù coma në sbefios a fà tut con malagrassia foravìa.

²⁵J'anvìe dël plandron a lo pòrto a meuire përchè soe man as arfudo 'd travajé.

²⁶Për tuta la vita l'òm pervers a chita pa ëd fé 'l goliard, ma l'òm giust a fà nen economìa ant le limòsne.

²⁷Ij sacrifissi fàit da ‘d gent grama a son n’abominassion, tant pì s'a son ësmonù con n'antendiment malegn.

²⁸Andrà a meuire 'l testimòni fàuss, ma l'òm ch’a l’é apressià përchè a dis sempe la vrità a podrà dì sempe la soa.

²⁹L'òm pervers a l'ha n'andi da sfacià, ma col ch’a l’é onest a aceta le coression.

³⁰A-i é gnun-a sapiensa, gnun savèj o gnun pian ch’i foma ch’a peusso buteje d’antrap a lòn che Nosgnor a veul fé.

³¹Bele s'it l'has prontà ij cavaj për ël di dla bataja, a l'é mach ël Signor ch’a peul dete la vitòria.