La Bibia piemontèisa/Testament Vej/Proverbi/Proverbi 2

←Proverbi 1

La Bibia piemontèisa Provèrbi

Proverbi 3→

La Bìbia piemontèisa - Proverbi 02

Provèrbi

2

Ij tesòr ëd la saviëssa

¹Fieul mè car! Ten an bon cont lòn ch’it diso e ij mè precèt fìch-tje bin an testa^[1]! ²Che toe orije a perdo gnanca na paròla ‘d lòn ch’a dis la saviëssa; che tò cheur a sia dël tut dovert a 'rsèive ‘l bon sens. ³Fà n’apel a l’antendiment ch’a ven-a da ti; ciama a gran vos che l’anteligensa at ven-a a l’ancontr. ⁴Vane a l’arsèrca coma s’as tratèissa d’argent, scandàjla coma s’it sërchèisse ‘d tesòr ëstërmà. ⁵Antlora it comprendras lòn ch’a veul dì ‘l timor ëd Dio^[2] e it rivras a conòsse la volontà ‘d Nosgnor^[3].

⁶A l’é da Nosgnor ch’a ven la saviëssa, e mach da chiel; a l’é da soa boca ch’a ven la conossensa e l’antendiment. ⁷A l’é chiel ch’a guerna për l’òm onest e giust ëd consej d’efet e sicur; chiel a l’é tanme në scu ch’a protegg coj ch’a vivo con bravëssa. ⁸Chiel a monta la vardia ai vieuj dij giust e a protegg ij pass ëd coj ch’a-j son fedej.

⁹A l’é antlora ch’it comprendras lòn ch’a sia na vita giusta e onesta, la vita onorà ch’a men-a al boneur. ¹⁰Ant ël moment che la saviëssa a intra an tò cheur për pijene la residensa, it godras ëd conossensa. ¹¹La prudensa a vijerà dzora ‘d ti e l’antendiment at guarderà. ¹²La saviëssa at salverà da j’angann ëd le përson-e grame, da cole ch’a stòrzo le paròle për confonde; ¹³da coj ch’a l’han chità ij senté dla dritura për marcé andrinta dë strà scure; ¹⁴Lor-lì a l’han piasì a fé ‘l mal e as arlegro dla përversità dle canaje. ¹⁵Soe assion ëd lor a son përverse e dzoneste, a van ans na strà ch’a pòrta mach a la rovin-a.

¹⁶La saviëssa at farà scampé da la fomna anciarmanta e 'nmoral^[4], da la fomna ch’a l’ha pa dë scrupoj moraj e ch’a deuvra ‘d paròle dosse. ¹⁷A l’ha chità ‘l marì ch’a l’avìa cand ch’a l’era giovo e a l’ha pa mantnù lë promësse^[5] ch’a l’avìa fàit dë 'dnans ëd Nosgnor. ¹⁸Soa ca a l’é drocanta e a craserà a mòrt coj ch’a l’àbito, a l’é an sla stra ch’a men-a al simiteri^[6]. ¹⁹L’òm ch’a-j fà visita a l’é condanà^[7], a podrà pi nen arpijé le stra dla vita.

²⁰Nopà, vaje dapress a le pianà dla gent da bin, resta an sël senté dij giust. ²¹Përchè mach ij giust a vivran ant ël pais^[8]; a-i restran mach coj ch’a son sensa rimpròcc. ²²Ij pervers a saran rancà via dal pais, ij traditor ëd Nosgnor a në saran dësreisà.

Nòte

1. O “guerna ij mè comandament drinta'd ti”.
2. O “lòn ch’a veul dì veneré Nosgnor”, avèine rispèt.
3. O “la conossensa ‘d Nosgnor”.
4. O “da l’adùltera”.
5. O “ël pat”, “l’aleansa”, “a l’é dësmentiasse dl'aleansa 'd sò Dé”.
6. O “ij sò vieuj a men-o vers ij mòrt”, o “al pais dj’ombre”.
7. O “a farà pì nen artorn”.
8. O “ant la tèra”.