La Bibia piemontèisa/Testament Vej/Numeri/Numeri 36

←Numeri 35

La Bibia piemontèisa Nùmeri

Deuteronòmi 1→

Ij nùmer

La Bìbia piemontèisa - Numer 36

36

Ëd problema riguard a n’ardità dàita a ‘d fomne

¹Ij cap ëd la parentela dij Galadita, dissendent ëd Machir, fieul ëd Manasse, un dij clan dij fieuj ëd Giusep, a son presentasse un dì ëdnans a Mosé, ai prinsipaj dël pòpol e ai cap ëd famija dj’Israelita, ²e a l’han dije: “Mosè, nost signor, quand che Nosgnor a l’ha comandaje dë spartì ‘l pais a sòrt an tra j’Israelita, a l’ha ‘dcò comandà a nòst signor ch’a dèissa l’ardità ‘d Zelofcad a soe fije^[1]. ³Ore, se lor a dovèisso mariesse con cheidun ëd n’àutra tribù israelita, soa ardità ‘d lor a sarìa gavà a nòstra tribù e, ant l’istess temp, a sarìa aumentà l’ardità 'd la tribù che loràutre a-i intro a fene part. ⁴Anlora, quand ch’a riva l’ann dël Giubileo dj’Israelita, soa ardità ‘d lor a sarìa gavà da l’ardità dij nòstri antich e a passerìa a esse patrimòni dla neuva tribù che loràutre a intro a fene part.

⁵Mosè, donch, a nòm ëd Nosgnor, a l’ha comandaje a j’Israelita: “A l’é com a diso ij fieuj dla tribù ‘d Giusep. ⁶A l’é per lòn che Nosgnor a comanda a le fije ‘d Zelofcad: ‘A podran esse le fomne ‘d chi ch’a-j pias ëd pì, mach ch’a sìa n’òm ëd la parentela ëd vòstra midema tribù. ⁷An costa manera j’ardità d’Israel a passeran pa da na tribù a n’àutra; minca israelita a resterà gropà a l’ardità 'd la tribù paterna. ⁸Përtant, se na fomna, a fà nen ëd che tribù, a ‘rsèiv n’ardità da sò pare, a l’ha da mariesse con n’òm d’un clan ëd soa tribù paterna. Parèj, minca Israelita a guernerà l’ardità dij sò antich, ⁹e a passerà pa da na tribù a n’àutra. Minca israelita a l’ha da resté gropà a l’ardità ‘d soa pròpria tribù”.

¹⁰Le fije ‘d Zelofcad a l’han conformasse a lòn che Nosgnor a l’avìa comandà a Mosè. ¹¹Macla, Tirsa, Ogla, Milca e Noa a son mariasse con ij fieuj d’un sò barba, ¹²d’òm ch’a ‘partenìo a ‘d famije dij dissendent ëd Manasse, fieul ëd Giusep.

¹³Costi-sì a son ij comandament e le prescrission che Nosgnor a l’ha daje a j’Israelita pr’ ël mojen ëd Mosè ant le Vàude ‘d Moab, an sle rive dël Giordan, an facia 'd Gérico.

Nòte

1. Cfr. Nùmer 27:7.