La Bibia piemontèisa/Testament Vej/Numeri/Numeri 25

Da Wikisource.

Ij nùmer[modifiché]

25[modifiché]

La Bìbia piemontèisa - Numer 25

Idolatrìa d’Israel a Peor[modifiché]

1Cand ch’a son ëstabilisse a Sitim, vàire d’om israelita a l’han comensà a susté le fomne moabita e a son antamnasse an cogiandse con lor[1]. 2Ora coste-sì a l'avìo anvità ‘l pòpol ai sacrifissi smonù ai sò dio, e j’Israelita a l'han mangiane e a son prostërnasse dë 'dnans a soe divinità ‘d lor. 3Parèj j’Israelita a son sogetasse al dio Baal ëd Peor e Nosgnor a l’é 'ndignasse fòrt contra d'Israel.

4Nosgnor a l’ha dit a Mosè: “Ciapa tùit ij cap dël pòpol e faje ampiché dë 'dnans a Nosgnor a la lus dël sol, parèj che la flin-a afoà dël Signor a sia dëstornà da Israel”. 5Mosè, anlora, a l’ha dàit ai giùdes d’Israel ësto comand: “Che mincadun ëd vojàutri a massa coj dij sò ch’a son sogetasse al dio Baal ëd Peor”.

6An col moment medésim a l’é rivaje n’Israelita ch’a portava na fomna madianita an mes ai sò frej, a la vista ‘d Mosè e ‘d tuta la comunità dj’Israelita ch’a piorava a l’intrada dla Tenda dël Rëscontr. 7Quand ch’a l’ha vëddù lolì, ël sacerdòt Pincas, fieul d’Eleasar e novod d’Aron, a l’é alvasse d’an mes ëd la comunità, a l’ha ciapà na lansa, 8a l’é andaje daré a col Israelita fin-a drinta dla tenda e ambelelà a l’ha trapassà ‘l vènter ëd tùit e doi, l’Israelita e cola fomna. A l’é anlora ch’a l’é chità l’epidemìa ch’a l’era rivaje an tra j’Israelita. 9Contut, ij mòrt ëd col maleur a l'ero stàit 24.000.

10Peui Nosgnor a l'ha parlà a Mosè. A l’ha dije: 11“Ël sacerdòt Pincas, fieul d’Eleasar e novod d’Aron, bogià da gran zel[2] për mi, a l’ha fàit chité mia 'ndignassion contra j’Israelita; a l’é për lòn che mia gelosìa a l’ha pa sterminaje. 12Donca, faje savèj che mi i faso con chiel n’aleansa ‘d pas: 13Con ëst’Aleansa mi i-j acòrdo an përpètuo ‘l sacerdòssi, a chiel e ai sò dissendent, përchè chiel a l’è viscasse ‘d zel për mi, për sò Dé, e parèj a l’ha fàit l’espiassion ëd la colpa dj’Israelita".

14L’Israelita mòrt con la Madianita as ciamava Zimri, fieul ëd Salu, e mèmber prinsipal d’un-a dle linie dla tribù ‘d Simeon. 15La fomna madianita mòrta as ciamava Cosbi, fija ‘d Sur, cap ëd famija d’un dij lineagi ‘d Midian.

16Nosgnor a l’ha parlaje ‘ncora a Mosè. A l’ha dije: 17“Ataché ij Madianita e buteje an derota! 18A son lor ch’a l’han tacave për prim con sò amboch, ordì contra ‘d vojàutri e ch’a l’han anciarmave con ij rit ëd Peor e avalendse ‘d Cosbi, fija d’un cap ëd Midian e sò compatriòta d lor, mòrta ant ël dì dl’epidemìa provocà për colpa ‘d Peor”.

Nòte[modifiché]

  1. Let. “a l'han comensà a prostituisse con le fije 'd Moab”.
  2. Ël tèrmin “zelo” a veul dì l’intensità e passion ëd sentiment për guerné e preservé j’istitussion che Nosgnor a l’ha stabilì.