La Bibia piemontèisa
Nùmeri

Ij nùmer

2

Disposission dij campament

¹Nosgnor a l’ha ancora parlaje a Mosè e a Aron. A l’ha dije: ²“J’Israelita a l’han da campesse d'antorn ëd la Tenda dël Rëscontr, ma a na certa distansa, mincadun press a sò drapò sota j’ansëgne 'd soe famije paterne. ³A levant, anvers orient, as acamprà l’ansëgna dël camp ëd Giuda, dëstribuì për batajon^[1]. A saran comandà da Nacson, fieul d'Aminadab.. ⁴Sò contingent a conta 74.600 censì.

⁵Aranda 'd chiel as acamperan coj dla tribù d'Issacar, comandà da Natanael fieul ëd Suar. ⁶Sò contingent a conta 57.400 censì. ⁷Peui la tribù ‘d Zabulon, comandà da Eliab fieul d’Elon. ⁸Sò contingent a l’é ‘d 57.400 censì. ⁹Ij censì dël camp ëd Giuda, dividù an soe unità a fan un total ëd 186.400 òm. Lor a dovertran la marcia.

¹⁰A meridion a butran camp coj dl'ansëgna dël camp ëd Ruben, con soe bande. Sò cap a sarà Elisor, fieul ëd Sedeur, ¹¹sò camp a l'è 'd 46.500 òm. ¹²Dacant ëd chiel as acamperan la tribù ‘d Simeon, comandà da Selumiel, fieul ëd Surisadai. ¹³Sò contingent a l’é ‘d 59.300 anregistrà. ¹⁴Peui la tribù ‘d Gad, comandà da Eliasaf, fieul ëd Reuel. ¹⁵Soa formassion a l’é ‘d 45.650 anregistrà. ¹⁶Ël total ëd le tre unità dl'esèrcit ëd ël campament ëd Ruben a l'é 'd 151.450 òm, distribuì për batajon. Durant la marcia a saran an sconda posission. ¹⁷Apress a 'rpijeran a marcé ij Levita con la Tenda dël Rëscontr, an mes dj' àutr campament. A seguiran l'órdin ëd campament. Mincadun a ocuparà 'l leugh che a-i corispond a lë svantajé 'd sò drapò.

¹⁸Da la part ëd ponent a s'acampran la gent d'Efraïm, distribuìa për batajon, conform a soe armeje. A saran comandà për Elisama, fieul d'Amiud. ¹⁹Ël sò camp d'armeja a conta 40.500 òm. ²⁰Aranda a s'acampran: la tribù de Manasse, capitanà për Gamliel, fieul ëd Pedasor. ²¹Sò contingent a conta 32.200 òm. ²²E la tribù ëd Beniamin, comandà da Abidan, ben Ghidegnoni. ²³Sò contingent a conta 35.400 òm. ²⁴An total, dividù ant j'armeje dl'esercit dël campament d'Efraïm a son 108.100 òm, distribuì për batajon. Lor a marceran për ters durant la marcia.

²⁵Da la part ëd nòrd as acamparan coj dël drapò 'd Dan, distribuì për batajon. A saran comandà da Achieser, fieul d'Amisadai. ²⁶Sò contingent a conta 62.700 òm. ²⁷Tacà as acamperan: la tribù d'Aser, comandà për Peghiel ben Ocran. ²⁸Sò contingent a l’é ‘d 41.500 òm. ²⁹La tribù 'd Neftali, guidà da Achira, fieul d'Enan. ³⁰Sò contingent a conta 53.400 òm. ³¹Ël total dl'armeja dël campament ëd Dan a l'é 'd 157.600 òm. Lor a saran j'ùltim e a marceran darera 'd tùit j'àutri con ij sò drapò.

³²Cost a l'é 'l rësultà dël censiment dj' Israelita për casà. Ël total dj' efetiv an sò campament, distribuì an batajon, a l'era 'd 603.550 òm. ³³Tutun, coj dla tribù 'd Levi a son pa stàit da censì con j'autri fieuj d'Israel, coma che Nosgnor avìa ordinà a Mosè. ³⁴Parèj j’Israelita a l’han compì precis tut lòn che Nosgnor a l'avìa comandaje a Mosè. Minca tribù a butava camp sota sò drapò e as butava an marcia për famije e casà.

Nòte

↑ J’Israelita a drissavo so acampament tanme n’acampament militar, minca na tribù con ij drapò e l’ansëgne ‘d soe famije. Ël drapò a l’avìa soa ansëgna tacà a la fin ëd na pertia e a l’era portà an bataja. A-i é gnun-a dëscrission ant la Bìbia coma ch’a l’avrìo podù esse costi drapò, combin che la figura ‘d na serp mensionà an Nùmer 21:8-9 a na dà n’idèja. A l’é probabil, contut, ch’a l’avèisso pa la forma ‘d na bestia për motiv ëd la proibission ant ël Decalogh. Ij drapò dle famije a j’ero salacad pì cit che coj dle tribù.

[1] J’Israelita a drissavo so acampament tanme n’acampament militar, minca na tribù con ij drapò e l’ansëgne ‘d soe famije. Ël drapò a l’avìa soa ansëgna tacà a la fin ëd na pertia e a l’era portà an bataja. A-i é gnun-a dëscrission ant la Bìbia coma ch’a l’avrìo podù esse costi drapò, combin che la figura ‘d na serp mensionà an Nùmer 21:8-9 a na dà n’idèja. A l’é probabil, contut, ch’a l’avèisso pa la forma ‘d na bestia për motiv ëd la proibission ant ël Decalogh. Ij drapò dle famije a j’ero salacad pì cit che coj dle tribù.

[1]