La Bibia piemontèisa/Testament Vej/Numeri/Numeri 17
Ij nùmer
[modifiché]17
[modifiché]La vërga d’Aron a gica
[modifiché]d'1Nosgnor a l’ha ‘ncora parlaje a Mosè[1]. A l’ha dije: 2“Comanda a j’Israelita che ‘l cap ëd minca na tribù at pòrto ognidun na vërga, un-a për minca ‘n cap ëd tribù, dódes vërghe; it l’has da scrivje dzora 'd mincadun-a ël nòm ëd col che a l’ha portala. 3An sla vërga ‘d Levi it ëscrivras ël nòm d'Aron, përchè a l’ha da essie na sola vërga për minca 'n cap ëd tribù, 4It l’has da piasseie ant la Tenda dël Rëscontr dë 'dnans a l’Èrca ëd l’Aleansa, ël leugh anté che mi im manifesto a vojàutri. 5La vërga dl’òm ch’i l’hai sernù a gicherà. Parèj i fareve chité le mormorassion dj’Israelita contra ‘d vojàutri.
6Anlora Mosè a l'ha parlà a j'Israelita, e tùit ij cap ëd tribù a l'han armëttuje na vërga pr' un, l’é a dì dódes vërghe an tut comprèisa cola d’Aron. 7Parèj Mosè a l'ha butaje dë 'dnans a Nosgnor ant la Tenda dl’Aleansa ‘d Nosgnor. 8Ël di apress, quand che Mosè a l'é tornà ant la Tenda dla Testimoniansa, la vërga d'Aron ëd la tribù ‘d Levi a l'avìa gicà e fiorì: possà 'd boton, s-ciodù 'd fior e fin-a con amàndole mure. 9Anlora Mosè a l'ha gavà coste vërghe da 'dnans Nosgnor e a l'ha faje vëdde a tuti j’Israelita; costi-sì a l'han constatà 'l miràcol e mincadun a l'é pijàsse torna soa vërga.
La memòria
[modifiché]10Peui Nosgnor a l’ha dije a Mosè: “Pòrta la vërga d’Aron an facia dla Testimoniansa e ch’a sia guernà tanme na marca për costi arviros. Parèj it faras chité le mormorassion contra ‘d mi e a l’avran nen da meuire[2]. 11Mosè a l’ha fàit përparèj, a l’ha fàit tut lòn che Nosgnor a l’avìa comandaje.
12J’Israelita a l’han dije a Mosè: “A l’é sicur ch’i meuireroma! I soma përdù, tùit i soma përdù. 13Tuti coj[3] ch’as n'ancalo a avzinesse al Tabërnàcol ëd Nosgnor, a l’han da meuire. L'avrom-ne anlora da s-ciopé fin-a a l'ùltim?”.