La Bibia piemontèisa/Testament Vej/Levitich/Levitich 2

←Levitich 1

La Bibia piemontèisa Levìtich

Levìtich 3→

Levìtich

2

La Bìbia piemontèisa - Levitich 02

Oferte ‘d farin-a

¹Cand cheidun ëd vojàutri a presenta a Nosgnor n’oferta vegetal^[1], l’oferta a sarà ‘d fior ëd farin-a; as vers-rà d’euli ansima e as giontrà d’ancens. ²Apress, a la porteran ai sacerdòt, ij dissendent d’Aron. Un ëd lor a në ciaprà na brancà ‘d cola farin-a, ampastà con d’euli e, con tut l’ancens, e a sarà brusà an sl’autar coma ‘n memorial: a l’é n’oferta d’odor agreàbil a Nosgnor. ³Lòn ch’a resta dl’oferta a sarà për Aron e për ij sò dissendent: cola-lì a l’é na part motobin sacrà, përchè a riva da j’oferte consumà dal feu an onor ëd Nosgnor.

⁴Cand che l’oferta a l’é cheuita al forn, a l’ha da esse ant la forma ‘d fogasse ampastà con d’euli, ëd pan sgnacà spalmà con d’euli. ⁵Se l’oferta a l’é cheuita dzora 'd na piastra, a l’avrà da esse ‘d fior ëd farin-a, sensa alvà e ampastà d’euli. ⁶Col ch’a la pronta, a la sfriserà a tòch e a-i vërsrà dzora d’euli. A l’é n’oferta ‘d gran. ⁷Se l’oferta a l’é cheuita ant na pèila, a l’ha ‘dcò da esse ‘d fior ëd farin-a ant l’euli. ⁸L’oferta preparà përparèj a sarà presentà a Nosgnor. L’oferta a sarà armëttùa al sacerdòt ch’a la butrà dapé dl’autar. ⁹Ël sacerdòt a prelevrà na part ëd l’oferta e a la bruserà an sl’autar coma n’oferta ‘d memorial, tuta consumà dal feu; cola-lì a l’é n’oferta d’odor agreàbil a Nosgnor. ¹⁰Lòn ch’a resta dl’oferta a sarà për Aron e ij sò dissendent: cola-lì a l’é na part motobin sacrà, përchè ch’a riva da j’oferte consumà dal feu an onor ëd Nosgnor.

¹¹Gnun-a dj’oferte ch’i presente a Nosgnor i l’eve da pronteje an fasend fërmenté la pasta. Gnun alvà a sarà brusà e gnanca ‘d giuss ëd fruta fërmentà coma n’oferta consumà dal feu an onor ëd Nosgnor. ¹²I-j podreve smon-e a Nosgnor coma d’oferte dle primissie dl’arcòlt, ma mai i-j pogereve an sl’autar coma n’oferta d’odor agreàbil a Nosgnor. ¹³Minca n’oferta ‘d gran a dovrà esse salà^[2]: an tut lòn ch’it ësmoneras a dovrà mai manché la sal, ch’a l’é ‘l simbol ëd l’aleansa che tò Dé a l’ha fàit con ti. Presenta ‘d sal con tute toe oferte.

¹⁴Cand ch’it presente a Nosgnor n’oferta dle primissie dl’arcòlt, fela dë spì ‘d gran frësche brusatà an sël feu e dë smens ëd gran neuv pistà. ¹⁵Ti ‘t vërsras d’euli ansima, it-i butras d’ancens, parèj coma ch’as fà con j’oferte ‘d gran. ¹⁶Ël sacerdòt a brusrà na part ëd ël gran e d’euli ansema con tut l’ancens coma n’oferta ‘d memorial consumà tuta dal feu an onor ëd Nosgnor.

Nòte

1. A l'era na sòrt ëd fogassa.
2. Cfr. March 9:50.