La Bibia piemontèisa/Testament Vej/Deuterocanonich/Tobia/Introdussion

Introdussion

La conta contnùa an cost lìber as presenta coma na stòria d'edificassion për la famija, anté che le vicende dl'ansian e motobin religios Tobi as mës-cio con cole dël fieul Tobia e dla giovna Sara, ch'a dventrà soa fomna. Costa narassion a l'ha dzortut ël but ëd mostré la fidelità a la lege 'd Dé, l'amor an tra pare e mare e an tra marì e mojé, l'arcòrd dij mòrt e la pràtica dl'almòsna.

Ël lìber ëd Tobia a l'é rivane an lenga greca, ma a l'origin a l'era an ebràich o aramaich. A lo dimostro vàire frament dël test, scrivù ant le doe lenghe, artrovà ant le balme 'd Qumran. Ël test grech a l'é rivane an doe redassion: "test longh" e "test curt".

Ël lìber ëd Tobia a còloca la vicenda ant n'época pì antica (la famija 'd Tobi a l'era stàita portà an esili a Ninive da j'Assir), ma a arflèt la religiosità ebràica dël ters o quart sécol a. C.

Schema

Soferensa e preghiera 'd Tobi e 'd Sara 1:1-3:17
Viagi e nòsse 'd Tobia 4:1-9:6
Artorn ëd Tobia 10:1-12:22
Càntica 'd Tobi 13:1-14:1
Epìlogh 14,2-15