La Bibia piemontèisa/Testament Vej/Deuterocanonich/Scond Macabé/Introdussion

Introdussion

Lë scond lìber di Macabé a l'é pa na continuassion dël prim. A conta, an efet, dël perìod ëd la stòria ebràica ch'a va dal 180 al 160 a. C. visadì 'l temp dl sacerdòt Onìa III fin-a a la mòrt ëd Nicànor, general ëd Demetrio I, rè 'd Siria. J'aveniment, donch, a son an part dl'istess temp a coj ch'a son contà ant ël capìtol da 1 a 7 dël prim lìber dij Macabé. Ël lìber as presenta tanme n'arsunt, compilà da n'autor dësconossù, dij sinch volum scrivù da lë stòrich Giason ëd Cirene. Al senter ëd l'antëresse a stan le tradission antiche dël pòpol e dël templ ëd Gerusalem con soe feste. Doe a son memorià an particolar: cola dla purificassion e dla consacrassion dël Templi (10:1-17) e cola ch'a selebrava la liberassion otnùa con l'amassidi 'd Nicànor (15:36). An soa conta, l'autor a buta an evidensa la costansa dij martir ch, ant la speransa dl'arsurression a van ancontra a la mòrt për esse fedej a la Lege 'd Dè. As sa bin pòch an sl'autor. Ij sinch lìber ëd Giason a son ëstàit scrivù apress l'ann 160 a. C. e nòst autor a l'ha fane n'arsunt motobin apress.