Introdussion

Ël lìber ëd Giudita a conta dël perìcol ch'a l'avìa da afronté 'l pòpol d'Israel, ocupà da na potensa imperialista coma ch'a l'era l'Assiria, e soa salvassion për ël mojen ëd na fomna bela, coragiosa e fidela a Nosgnor, Giudita, ch'a riess a massé Olofernes, ël comandant ëd l'armea nemisa. Ant ës lìber vàire dàit ëstòrich a son nen precis: as parla 'd Nabucodenesar, rè 'd Ninive, che, a l'opòst, a l'ha regnà a Babilònia an tra j'agn 604-562, cand che la potensa dj'Assir a l'era già dësparìa. Tuta la vicenda a l'é colocà ant la comunità ebràica ch'a l'era artornà da l'esili an Babilonia. Is trovoma donca apress dël 538 a. C. ant un temp che 'l templi 'd Gerusalem a l'era già stòit arcostruì e 'l cult an eficiensa pien-a. D'amprecision coma ste-sì a l'han fàit pensé a 'd savant che costa conta a sia nen n'euvra stòrica, ma d'edificassion, ch'a veul mostrene la fiusa an Nosgnor, ël valor ëd la preghiera, la fidelità a la lege 'd Mosè e la potensa 'd Dé, ch'a lìbera sò pòpol për ël mojen ëd na fomna,

As conòss pa 'l nòm dl'autor. Cost liber a 'é rivane an lenga greca, ma 'd sòlit a l'é considerà na tradussion dl'original aramaich, o forse ebràich, ch'i l'oma përdulo. I conossoma, an efet, vàire citassion antiche dël test ebràich. L'autor, ch'a l'é probabil a stasìa an Palestina apopré dla mità dël second sécol a. C. a l'ha scrivù costa conta për assicuré ij sò destinatari, sogetà a 'd pëersecussion, che Nosgnor a chita mai un pòpol ch'a-j sìa fidel.

Schema

Invasion ëd la Palestina e assedi dla sità 'd Betulia - 1:1-7:32
Giudita a massa Olofernes - 8:1-14:10
Vitoria dj'Israelita 14;:11-16:25