La Bibia piemontèisa
Ij lìber dle Crònache

1 Crònache

11

David a riva esse rè

¹Parèj tuta Israel a l'é rassemblasse d'antorn a David a Ebron. E a l'han dije: “Nojàutri i soma toa gent, carn ëd toa carn e sangh ëd tò sangh”. ²Na vira, al temp che Saul a l'era nòst rè, it j’ere ‘l comandant general dle fòrse armà d'Israel. Nosgnor tò Dé a l'avìa dite: “Ti't ëmneras an pastura Israel, mè pòpol; e it saras soa guida”. ³Anlora tuti j'ansian d'Israel a son andàit a trové 'l re a Ebron, e a l'han fait n'aliansa con chiel ëdnans a Nosgnor e a l'han sacralo rè d'Israel, conform a lòn che a l'avìa dit Dé per boca 'd Samuel.

Conquista 'd Gerusalem

⁴David e l’armada antrega d’Israel a son portasse contra 'd Gerusalem, che antlora as ciamava Jebus; ambelelà a-i stasìo ij Gebusé, abitant ëd col pais. ⁵Ij Gebusé a l'avìo dije a David: “Sì ,ti t'intreras pa!”. Tutun David a l'é fasse padron ëd la fortëssa'd Sion, ch’a l'é vnùita parej esse ciamà: la Sità 'd David.

⁶David a l'avìa dit a soe trupe: “Ël prim che a fraprà un Gebusé a dventrà ‘l comandant general ëd mie armade. Ël prim a monté a l'è stait Joab, fieul ëd Sëruià, parèj che dun-a a l'é stait nominà general an cap.

⁷David a l'é anstalasse ant la fortëssa, ch’a l’ha fala soa abitassion. Për lòn a l'é staita peui ciamà "Sità 'd David". ⁸Chiel a l’ha peui fàit ëslarghé la sità tut dantorn, dal terapé ciamà Milo, fin-a a j'anviron, antramentre che Joab a l'ha restaurà la resta dla sità. ⁹David andasìa a chërse an podej: Nosgnor dl'univers a l'era con chiel.

Ij tre guerié ij pì vajant ëd David

¹⁰Costi-sìa a j’ero ij cap dij vajant ëd David che a l'ero a sò servissi,e che l'han giutalo con tuta Israel a fé sicur ël regn për proclamelo re, parej tanme Nosgnor a l'avia promëttuje a Israel. ¹¹Costa-sì a l’é la lista dij guerié ‘d David.

Iasobeam, ël Cacmonita, cap fj’ufissié ch’a l'han massà tërzent òm con soe lanse ant n’ùnica bataja. ¹²A seguìa Eleasar, fieul ëd Dodo, dël clan d'Acoca, un dij tre vajant ëd David. ¹³Chiel a l'era con David a Pasdamim; e ij Filisté a son rassemblasse ambelelà për combate. A-i j'era ansilì un camp pien d'òrdi, e la gent a ‘rculava ‘dnans ai Filisté; ¹⁴ma peui j'òm d'Eleasar a son a butasse an mes dla coltivassion, a l’han difendù 'l camp e a l’han butà an derota ij Filisté. Parej che la vitòria che a l'ha conceduje Nosgnor a l'é staita strasordinaria.

¹⁵Un bel di, tre dij Tranta vajant, a son calà a trové David da para dël ròch, ant la balma d'Adulam, antramentre che l'esércit Filisté a l'avìa butà camp ant la comba dij Refaita. ¹⁶David a stasìa an col arfugi fortificà, e a Betlem a-i j'ëstasìa na guarnigion dij Filisté. ¹⁷David, tutun, a l'avìa anvìa d'eva bon-a e a l'ha dit: “Oh, se mach cheicadun am dèissa da beive, ëd che gust i beiverìa l'eva dla sisterna che a-i è a l'intrada 'd Betlem!”. ¹⁸Antlora coj tre, passand an mes al campament dij filisté, a son andait a tiré d'eva a la sisterna dl'intrada 'd Betlem e a l'han smonùjla a David. Tutun chiel, a l'ha pa vorsùine beive. A l'ha spatarala tuta për tèra, rendendla na libagion smonùa a Nosgnor. ¹⁹antramentre a disìa: “Che Dé am varda ‘d beila! St'eva a l'é'l sangh ëd costi òm che a son andait a rìsigh ëd soa vita: a l'han butà an perìcol la vita për portemla!”. David, donch, a l'ha pa vorsù beivne. Tut sòn a l'é n’esempi dl’imprèise ‘d coj Tre.

Ij tranta guerié pì vajant ëd David

²⁰Abisai, frel ëd Joab, a l'era cap dij Tranta. Un di, a colp ëd lansa a l'ha massà terzent òm, tutun soa fama as podìa nen paragonesse a cola 'd coj tre. ²¹A l'é stait considerà ancora 'd pì, an tra'd coj che a l'era a cap, tutun a l'é pa stait a l'autëssa dij mérit dij tre vajant.

²²Benaia,da Cabzel, fieul dël gran guerié Joiada, a l'avìa fait vàire prodësse. A l'ha massà doi fieuj d'Ariel, opura doi guerié vajant o ancora doi leon ëd Moab e, ant un di ëd fiòca, a a l'ha massà un leon ch’a l’era tombà drinta ‘d na sisterna l’ora che chiel a-j stasìa dapress. ²³A l'é andàit a bate dcò n' Egissian, àut pì 'd doi méter^[1], che a portava na lansa gròssa parej ëd na subia da tëssior; tutun a l'ha afrontalo con un baròt, a l'ha s-ciancaje 'd man l'asta e a l'ha massalo.

²⁴Coste a son staite j'impreise'd Benaia, fieul ëd Joiada, e chiel a l'é fasse un nòm an tra ij tre vajant. ²⁵Chiel-sì a l'é stait considerà pì che tuit ij Tranta, tutun a lè mai stait a l'autëssa dj' àutri tre. David a l'ha constituilo al comand ëd la vardia real.

²⁶Ij vajant dl'armeja a l'ero: Assael,frel ëd Joab; Elcanan,fieul ëd Dodo, betlemita; ²⁷Samòt, da Aror; Cheles, ël pelonita; ¹²⁸MIrà,fieul d'Iches da Tecoa; Abieser,d'Anatòt. ²⁹Sibecai, Cussatita; Ilai, dël clan d'Acoach; ³⁰Marai,da Netofà; Cheled fieul ëd Baanà,da Netofà; ³¹Itai, fieul ëd Ribai, da Guibà 'd Beniamin; Benaià, da Piraton; ³²Curai, dal torent ëd Gàas; Abiel, l'Arbatita; ³³Asmàvet, da Bacurim; Eliacbà, da Saalbon; ³⁴ij fieuj ëd Hasem, ël Guisonita; Jonatan, fieul ëd Sagué l'Ararita; ³⁵Achiam, fieul ëd Sacar l'Ararita; Elifal fieul d'Ur; ³⁶Chéfer, ël Mecheratita; Achià, ël Pelonita; ³⁷Chesrò, da Carmel; Naarai fieul d'Esbai; ³⁸Joel, frel ëd Natan; Mibcar, fieul d'Agrì; ³⁹Sèlech l'Amonita; Nacrai, da Berot, ëscudié 'd Joab, fieul ëd Seruià; ⁴⁰Irà, da Jatir; Gareb, da Jatir; ⁴¹Uria, l'Hitita; Zabad, fieul d' Aclai; ⁴²Adinà, fieul ëd Sisà, dla tribù 'd Ruben, cap dij Rubenita, ij Tranta òm che a l'ero con chiel. ⁴³Canan,fieul ëd Maacà; Joissafat, ël Mitnita; ⁴⁴Usià, d'Aistarot; Samà e Jeiel, fieuj ëd Cotam d'Aroer; ⁴⁵Jediael, fieul ëd Simrì; Jocà, so frel ël Tissita; ⁴⁶Eliel,ël Macavita; Jeribai e Joissavià, fieuj d'Elnàam; Itmà, ël Moabita; ⁴⁷Eliel, Obed e Jaassiel, da Sobaià

Nòte

↑ Lét. “sinch cùbit”.

[1] Lét. “sinch cùbit”.

[1]