La Bibia piemontèisa/Testament Vej/Cronache/2Cronache22

←2 Crònache 21

La Bibia piemontèisa Ij lìber dle Crònache

2 Crònache 23→

La Bìbia piemontèisa - 2 Crònache 22

22

Acasìa a regna an Giuda

¹Anlora la gent ëd Gerusalem a l'ha proclamà rè a sò pòst ël fieul pì cit ëd Jeoram, valadì: Acasìa, përchè tuti coj pì vej a l'ero stàit massà da la banda ch'a l'era intrà con j'Arab ant ël campament. A l'é parèj che Acasìa fieul ëd Jeoram a l'é vnùit esse rè. ²Acasìa a l'avìa vintedoi agn cora che a l'é dventà rè 'd Giuda e a l'ha regnà n'ann sol a Gerusalem. Soa mare a l'era Atalia, la novoda d'Omri. ³Ëdcò Acasìa a l'ha seguità ‘l cativ esempi dla dinastìa d'Acab, përchè soa mare a l'ha daje ‘d consej d'empietà.⁴A l'ha fàit lòn ch’a l’é mal a j'euj dël Signor, giusta coma a fasìo coj dla famija d'Acab. Lor a son fin-a dventà ij sò consijé apress ëd la mòrt ëd sò pare, lòn ch’a l'ha portalo a soa ruin-a.

⁵Dasendje da ment ai consèj ëd costissì, Acasìa a l’é giontasse a Ioram, ël fieul ëd Rè Acab d’Israel, an soa guèra contra 'd Casael ëd Siria, an Ramot ëd Ghilead. ⁶Cand che j’Aramé a l'han ferì Ioram an bataja, chiel a l'é tornass-ne a Iesrel, për curesse da le ferìe ch'a l'avìa arseivù dai Sirian a Ramot ant ël moment che a l'era stàit batù contra Casael d'Aram. Acasìa, fieul dël rè Jeoram ëd Giuda, a l'é vnùit giù a visité Ioram, fieul d'Acab, a Iesrel, përchè chiel-sì a l'era stàit ferì^[1].

⁷A l'é staita, contut, la volontà 'd Dé che Acasìa, për soa ruin-a, a 'ndèissa da Ioram. An efet, cand ch’a l'é rivà, a l'é surtì con Ioram contra 'd Ieu, fieul ëd Nimsi, che 'l Signor a l'avìa consacrà për dësblé la dinastìa d'Acab.

⁸Antramentre che Ieu a fasìa giustissia dla famija d'Acab, a l'ha 'dcò trovà ij cap ëd Giuda e ij novod d'Acasìa, sò servitor, e a l'ha massaje. ⁹Chiel a l'ha peui ancora fàit sërché Acasìa, che a l'han trovà stërmà an Samaria. A l'han portalo da Ieu, ch’a l'ha falo massé. Ma a l'han sotralo, përchè a disìo: “A l'é fieul ëd Ieosafat che a l'ha arsërcà Nosgnor con tut sò cheur”. Ma gnun dij mèmber ch’a l’ero dzorvivù dla famija d’Acasìa a l’era bon a governé ‘l regn.

La regin-a Atalia a governa Giuda

¹⁰Cora che Atalia, mare d'Acasìa, a l'ha vëddù che a l'era mòrtie sò fieul, chila a l'é proponusse dë sterminé tuta la dissendensa dla famija real ëd Giuda. ¹¹Ma Jeosabeat, fija 'd Rè Jeoram, a l'ha ciapà Joas fieul d'Acasia e a l'ha stërmalo, an gavandlo da la rimanensa dij dissendent reaj destinà a la mòrt. Chila ansema a la bàila, a l'ha falo intré ant la stansia da let e parèj che Jeosabeat, fija 'd rè Jeoram e fomna dël sacerdòt Jehoiadà e che a l'era 'dcò la seure d'Acasìa, a l'ha salvà Joas da Atalia, che për lòn a l'ha pa falo massé.

Nòte

1. Ebr. “përchè ch'a l'era malavi".